СПИЕТЕ, НО СЕ БУДИТЕ НЕНАСПАНИ: Кога потребата за сон треба да ве загрижи

Потребата за повеќе од седум до девет часа сон, може да бидат знак и за некои состојби како што се апнеа или клиничка депресија

По седум до девет часа сон, треба да се чувствувате свежо и одморено, тврдат стручњаците од Националната фондација за спиење. Но, секоја личност е поинаква, а постојат и некои периоди во животот кога е потребно повеќе сон од вообичаено. За таков период се смета и бременоста.

“Телото минува низ многу промени кога сте бремена, што може да предизвика недоволно енергија, поради што се јавува и поголема потреба за сон“, објаснува неврологот д-р Даниел Барон.

Но, треба да се биде внимателен, истакнува тој. Трудниците може да развијат апнеа, пореметување на спиењето поради кое доаѓа до престанок на дишењето во сон. Ова предизвикува будење во текот на ноќта и спречува да потонете во длабок сон. Запомнете, вели д-р Барон, не е важна само количината на сонот, туку и неговиот квалитет.

“Ако забележите дека ‘рчите или често се будите во текот на ноќта доаѓајќи до здив, разговарајте со совојот гинеколог за тоа“, советува неврологот.

Освен бременоста, подготовките за некои напорни натпревари бараат повеќе сон.

“Ако интензивно тренирате, или се подготвувате за некој натпревар, спиењето е единствено време кога вашето тело се опоравува. Особено во најдлабоката фаза на сонот, кога всушност најмногу одморате“, вели д-р Барон.

Потребата за повеќе од седум до девет часа сон, може да бидат знак и за некои состојби како што се апнеа или клиничка депресија, цени тој.

Според него, важно е да се открие причината, оти со правилен третман може да се ублажат симптомите и да се врати потребната енергија. Ако постојано сте уморни, разговарајте со својот матичен лекар.