Варијантата на коронавирусот – омикрон, која предизвикува КОВИД-19, можно е да добила најмалку една од своите мутации собирајќи исечок од генетски материјал на друг вирус – веројатно оној кој предизвикува настинка – истовремено присутен во заразените клетки, објаснуваат американските научници.
Оваа генетска секвенца не се појавува во ниту една претходна верзија на коронавирусот, нарачен SARS-CoV-2, но е присутна кај многу други вируси, вклучувајќи ги и оние кои предизвикуваат настинка, а исто така и во човечкиот генот, велат научниците.
Со вклучувањето на таа секвенца во сопствената структура, омикрон би можел да изгледа „почовечки“, што би му помогнало да избегне напад од човечкиот имун систем, вели Венки Соундарарајан од компанијата за анализа на податоци со седиште во Кембриџ.
Тоа би можело да значи дека вирусот полесно се пренесува, а да предизвикува само блага или асимптоматска болест.
Научниците се уште не знаат дали омикрон е позаразен од останатите варијанти, дали предизвикува потешка болест и дали ќе ја потисне делта како најраширена варијанта.
Може да поминат и неколку недели до одговорите на овие прашања.
Според претходни студии, клетките во белите дробови и гастроинтестиналниот систем можат истовремено да “вдомат“ SARS-CoV-2 вирус и вируси на обични настинки.
Таквата истовремена инфекција создава услови за вирусна рекомбинација, процес во кој два различни вируса во иста клетка-домаќин во меѓусебна интеракција се копираат, создавајќи нови копии кои имаат генетски материјал од двата “родитела“.
Оваа нова мутација најпрво би можела да се појави кај лица заразени со двата патогени кога варијантата на вирусот SARS-CoV-2 ја “собрала“ генетската секвенца од друг вирус, велат Соундарарајан и соработниците во студијата, која се уште не е рецензирана.
Истата генетска секвенца се појавува многу пати кај еден од коронавирусите што предизвикува настинка кај луѓето – познат како HCoV-229E – и кај вирусот на хумана имунодефициенција (ХИВ) што предизвикува СИДА, вели Соундарарајан.
Јужна Африка, каде прв пат е идентификувана омикрон варијантата, има највисока стапка на ХИВ во светот, што го ослабува имуниот систем и ја зголемува подложноста на лицето на инфекции со вируси на настинка и други патогени.
Во овој дел од светот, има многу луѓе кај кои би можела да се случи рекомбинацијата која ја внела таа сеприсутна група на гени во омикрон, додава Соундарарајан.
“Веројатно сме превиделе многу рекомбинации што се случиле со тек на времето и кои доведоа до појава на омикрон“, потенцира Соундарарајан.
Потребни се повеќе истражувања за да се потврди потеклото на мутациите на омикрон и нивниот ефект врз функцијата и преносот на вирусот.
Постојат и други хипотези дека најновата варијанта омикрон можеби поминала некое време развивајќо се во животното домаќин.
Во меѓувреме, вели Соундарарајан, новите откритија ја нагласуваат важноста луѓето да ги добијат моментално достапните вакцини против коронавирусот.
“Мора да се вакцинирате за да ги намалите шансите други луѓе, кои се со намален имунитет, да се сретнат со SARS-CoV-2 вирусот“, вели Соундарарајан.
