Иако ретко, причина за појавата на непријатен здив може да биде и гастритисот, па особено внимание треба да се обрне на желудникот. Доколку не доаѓа до подобрување на состојбата, треба да се побараат и други можни причинители, а тоа се системски болести, како болести на бубрезите, црниот дроб или белите дробови, потенцираат стоматолозите.
Иако халитозата најчесто е последица на незадоволителна хигиена на устата и на забите, како и внесот на храна со силен мирис, преглед кај гастроентеролог во случај на халитоза е потребен по исклучување на причината за халитозата во усната шуплина, особено кога е поврзан со симптоми на болести на желудникот, болка и печење зад градната коска, чувство на тежина во стомакот, мачнини, повраќање или жиговина.
Истражувањата покажуваат дека 87% од причините за непријатен здив од усната шуплина се однесуваат на парадонтни болести или обложеност на јазикот. Најчесто е предизвикан од комбинација на заостаната храна меѓу забите и лошата орална хигиена, која предизвикува воспаление на забното месо.
Анаеробните бактерии за чии развој се потребни услови без кислород, се населуваат во деловите на кои се собираат остатоците од храна. Тие бактерии создаваат сулфурни соединенија кои имаат непријатен мирис.
