М-р фарм. Стевче Ацевски: Препораки за правилна употреба на антибиотиците

Несоодветната употреба на антибиотиците овозможува се повеќе бактериите да развиваат механизми на резистенција кон овој тип на лекови, затоа од исклучителна важност е да се користат правилно.

Пишува: М-р фарм. Стевче Ацевски, доктор по фармацевтски науки


Развојот на антибиотиците е едно од најголемите откритија на модерната медицина. Антибиотиците се користат во борбата против бактериите и може да излекуваат животно-загрозувачки болести. Но, несоодветната употреба на антибиотиците овозможува се повеќе бактериите да развиваат механизми на резистенција кон овој тип на лекови, затоа од исклучителна важност е да се користат правилно.

Антибиотиците треба да се употребуваат само после препишување од страна на лекар. Само заради губење на симптомите на болеста, не треба да се прекине употребата на антибиотиците предвреме, бидејќи нецелосно уништување на бактериските соеви кои ја предизвикале инфекцијата може да доведе до повторно појавување на инфекцијата и повторно започнување на болеста.

Во случај да ви останат таблети од терапијата, не треба да се чуваат за понатамошна употреба или да се даваат на други луѓе. Остатоци од терапијата не треба да се фрлаат во тоалет, бидејќи на таков начин се загадува околината и може да придонесат за зголемување на бактериската резистенција.


Лековите ќе бидат активни само ако се употребуваат правилно. Многу е важно да се знаат следниве работи при земањето на антибиотици:
  • Дали може да се кршат таблетите на помали парчиња со цел да може полесно да се проголтаат?
  • Треба да се знае дека со кршење на таблетите може да се наруши нивното правилно делување.

  • Со која храна може да се земаат антибиотиците?
  • Антибиотиците вообичаено се препорачува да се земаат со вода. Конзумирање на антибиотиците со овошни сокови, хранливи производи или алкохол може значително да влијае врз ресорпцијата на антибиотикот, па со самото тоа и значително да влијае врз неговата ефикасност. После земање на антибиотици, може да се почека до три часа од наредно земање на некои диетални производи кои би можеле да влијаат врз актвноста на лекот, како на пример млеко, путер, јогурт или сирење. Сокови од грејпфрут или други диетални суплементи кои содржат калциум исто така може да влијаат врз ефикасноста на антибиотикот.
  • Кога треба да се земаат антибиотиците?
  • Некои антибиотици треба да се земаат во точно определено време од денот, некои се препорачува да се земаат пред, а некои после оброк. Препорачливо е да се земаат антибиотици во точно определено време, согласно утврдениот режим на дозирање.

  • Дали може да се земаат антибиотиците со други лекови?
  • Антибиотиците може да интереагираат со други лекови, важно е да се напомене на лекарот или фармацевтот кои други лекови ги употребува пациентот. Антибиотиците може да реагираат со некои препарати од групата на хиполипемиците или антациди, исто така антибиотиците може да ја намалат ефикасноста на контрацептивните средства.

Сите информации за употреба на антибиотиците може да се прочитаат во внатрешното упатство на лекот, но доколку не сте сигурни која од препораките е значајна при терапија со антибиотик, консултирајте се со вашиот доктор или фармацевт.