Пореметувањето на рамнотежата меѓу улогата што ја има слузницата на желудникот и количината на излачени желудочни сокови е еден од причинителите за појава на проблеми и болки во желудникот. Како последица лицето има киселини, болка во стомакот, тежина во желудникот, подуеност, подригнување или мачнина. Ако потешкотиите не се лекуваат на правилен начин, може да ескалираат до многу сериозни болести.
Како причини за болки во желудникот стручњаците како најчести тригери ги посочуваат масната и зачинета храна, континуираната изложеност на стрес, а во некои случаи и одредени лекови или Хеликобактер пилори.
Диспепесија
Диспепсија е заеднички назив за потешкотиите кои се локализирани во горниот дел на дигестивниот систем и се јавуваат во текот на консумирање/дигестија на храната. Најчесто се јавува во средната животна доба и ги погодува подеднакво двата пола, со малку поголема честота кај мажите. Според некои истражувања, третина од популацијата пати од наведените проблеми. Голем број на овие пациенти имаат оштетувања на горниот дел на гастроинтестиналниот систем, чир на желудникот или на дванаесетпалечното црево.
Пациентите се жалат на следните симптоми: болка, чувство на непријатност, тежина и мачнина во желудникот.
Надразнет желудник (функционална диспепесија)
До дијагноза надразнет желудник најчесто се доаѓа поради мачнини, чувство на прејаденост, подуеност во цревата, киселини, болки во желудникот, па се до лош здив од устата. На појавата на симптоми во голем дел влијае стилот на живот, лошите прехранбени навики, неподносливост на некои намирници, консумирање алкохол, пушење и изложеност на стрес.
Гастритис
Една од најчестите болести на модерното општество е сигурно гастритисот. Под гастритис се подразбира воспалителна болест на слузницата на желудникот. Акутниот гастритис е дефиниран со изненадувачка и минлива состојба на болка во желудникот, за разлика од хроничниот кој трае подолго време. Повеќето пациенти со повремени болки во желудникот немаат гастритис, но во ситуации кога слузницата се воспалува може да чувствуваат непријатност проследена со силни болки во желудникот. Еден од симптомите на гастритис е болка во горниот дел од стомакот, подригнување или икање. Гастритисот често е предизвикан од бактериска инфекција, меѓу кои најпозната е хеликобактер пилори.
Гастритисот за последица често ја има улкусната болест, позната како чир на желудникот или дванаесетпалечното црево.
Сигнал за аларм
Како што се симптомите од лице до лице поинакви, така одредени лица поради неочекувана болка во желудникот бараат стручна помош. За други, пак, повраќањето и силна подуеност може да бидат главни симптоми поради кои ќе отидат на лекар. Запомнете, знак за аларм, секако, е силната болка во желудникот која се шири во стомачната шуплина проследена со надуеност, мачнина и повраќање, немање редовна столица или присуство на крв во неа.
