СТРУЧЊАЦИТЕ ПОТСЕТУВААТ: Зачестеното миење раце како да падна во втор план. Зошто оваа мерка и натаму е важна како заштита од КОВИД-19?

По воведувањето на мерки и јавни дискусии околу тоа треба или не треба да се носат заштитни маски, за миењето раце се помалку се зборува. Дали навистина е помалку важно? Никако, велат стручњаците.

Во арсеналот со кој располагаме во борбата против ширењето ан новиот коронавирус, а кој опфаќа – заштитна маска, самоизолација и одржување на физичка дистанца – еден елемент е лесно да се превиди: миењето раце.

Откако КОВИД-19 стана глобална пандемија, здравствените агенции и власти низ светот не затрупаа со упатства како да се заштитиме. Помеѓу другото, стигна и препорака за редовно и зачестено миење на рацете со сапун во топла вода, барем 20 секунди и тоа повеќе пати дневно.

Но, по воведувањето на построги мерки и јавните расправи околу тоа треба или не треба да се носат заштитни маски, миењето раце падна во втор план.

Дали поради тоа е помалку важно? Никако, велат здравствените експерти. Хемискиот состав на коронавирусот, поточно неговите липидни мембрани, може да биде нарушен со темелно миење на рацете со обичен најевтин сапун и топла вода, што го олеснува уништувањето ан опасниот дел од вирусот.

  • Сапунот е задолжен за уништување на мембраната и елиминирање на рибонуклеинската киселина која влегува во човечкото тело каде ги превзема клетките на домаќинот и се клонира. Топлата вода помага тој процес да се забрза.
  • Притоа, водата нужно не мора да биде питка, туку загреана, ако при рака имате и сапун. Само вода не е доволно, оти мембраните на вирусот се составени од маснотии, за чие отстранување е потребен сапун.
Препорачливо е рацете да се мијат неколку пати дневно, на секој 2-3 часа, доколку минувате повеќе време надвор од домот.

Миењето раце делумно е занемарено и поради масовното воведување на дезинфекциски средства. Тие се добри ако при рака немате сапун и топла вода, но дома сепак темелно треба да се измијат рацете.

Исто така, претераното користење на средства за дезинфекција долгорочно не е добро, бидејќи придонесува за намалување на отпорноста на организмот на бактерии и други штетни елементи. Затоа, подобро користете сапун и вода, кога и да сте во можност.