Стручаците за спиење предупредуваат дека недостатокот на сон треба да се сфати многу посериозно бидејќи ефектот кој го има врз мозокот е сличен на пијанството, покажала студија од УЦЛА и Универзитетот Тел Авив од Израел, објавена во магазинот Nature Medicine.
Ова истражување потврдило дека недостатокот на квалитетен сон влијае на функциите на мозокот и дека може да предизвика лапсуси во меморијата, како и искривена визуелна перцепција. Тоа е затоа што приврремено се намалува комуникацијата меѓу невроните. Така, на уморните возачи им недостасува концентрација затоа што невроните не реагираат ефикасно колку што би требало, и на нивниот мозок му треба подолго време да забележи што се случува. На клетките на мозокот им е потребно повеќе време да реагираат, што е поврзано со побавни мозочни бранови, како оние што се забележани за време на фазата на спиење, а кои ја реметат мозочната активност и извршувањето на задачите. Овој феномен сугерира дека кај ненаспаноста, одредени регии во мозокот „дремат“ и предизвикуваат ментални лапсуси, додека другиот дел од мозокот е буден.
„Откривме дека измачувањето на телото со неспиење им ја одзема на невроните способноста да функционираат како што би требало. Тоа им го отвора патот на когнитивните лапсуси, како перципираме и како реагираме на светот околу себе“, се вели во студијата во која уште се додава: „Фасцинантно е како недостатокот на сон ја замаглува активноста на мозочните клетки. Клетките стануваат тромави и комуникацијата меѓу невроните се намалува. Место вообичаено брзо да реагираат одговорот на невроните е забавен, послаб, а трансмисијата подолго трае од што е вообичаено.
Студијата предупредува дека ефектите од недостаток на сон се како некој вид пијанство.
„Неадекватното спиење има сличен ефект на мозокот, како и преголемото количество алкохол“, се објаснува во студијата.
