Стручно со д-р Лилјана Брајевиќ: Оперативниот третман на хемороидите е неопходен ако болеста е во напреден стадиум

Хемороидалните јазли се изградени од сплет на артериски и венски крвни садови и се важен анатомски дел во одржување на нормалната функција на анусот, како што се задржување на столицата и на гасовите.

Пишува д-р Лилјана Брајевиќ, хирург


Хемороидалната болест е многу често заболување во денешно време, и дека се смета оти околу половина од возрасните луѓе имаат некакви тегоби поврзани со постоење на хемороиди.

Хемороидалните јазли се нормална анатомска структура во завршниот дел на дебелото црево, односно анусот. Тие се изградени од сплет на артериски и венски крвни садови и се важен анатомски дел во одржување на нормалната функција на анусот, како што се задржување на столицата и на гасовите.

Што се хемороиди?

Хемороидите се отечени, проширени вени на аналниот отвор.

Тие настануваат како резултат на зголемениот крвен притисок во крвните садови во карлицата, а се формираат слично како проширените вени на нозете. Хемороидите се нормални крвни садови кои под дејство на преголем притисок се прошируваат, истегнуваат, отекуваат, воспалуваат и почнуваат да излегуваат. Доколку се појават и откријат во порана фаза може да се вратат во нормалната состојба, но доколку дојдат во понапреднат стадиум, тогаш не може да се повлечат и единствено решение е хируршки да се отстранат.

Хемороидалните јазли се нормална анатомска структура во завршниот дел на дебелото црево, односно анусот

Чест проблем кој не се сфаќа сериозно

Воспалението може да се смири, циркулацијата на крвта може да се поправи и отечените  места да се повлечат, а луѓето кои се склони на хемороиди мора да внимаваат на исхраната и да внесуваат повеќе течности за да немаат запек или пролив. Хемороидите се релативно честа појава и можат да бидат многу болни, но сепак, не се сфаќаат како сериозен медицински проблем. Факт е дека станува збор за непријатен проблем и многумина се срамат да отидат на преглед, па со години се обидуваат сами да се излекуваат со креми, капки, чепчиња, кои само привремено ја подобруваат состојбата, но не го решаваат проблемот.

Од чешање до тешка анемија

Хемороидите се класифицирани во четири фази – од најбезболни до хемороиди на кои им е потребен хируршки третман.

Најчести причинители кои ја нарушуваат нормалната циркулација се: хроничен запек, заболување на црниот дроб, бременост, работа поврзана со долго седење, одреден тип храна, наследен фактор… Пациентите најчесто се жалат на појава  на светлоцрвена крв во столицата, чешање, повремена болка, тромбоза (згрутчување) на хемороидалниот јазол, пролапс (испаѓање) на хемороидите низ анусот и сл.

Честото и долготрајно крвавење, може да доведе до тешка анемија кај пациентите, која може да е и живото загрозувачка. Дијагнозата се поставува со ректален преглед и со аноскопија. Кај пациентите над 50 години, задолжително треба да се направи колоноскопија за да не се превиди  постоење на рак на дебелото црево.

Операција

Методата  ХАЛ-РАР е минимално инвазивна процедура за третман на сите типови симптоматски хемороиди чија состојба не се подобрила со конзервативниот третман. Операцијата се изведува во општа анестезија, по претходен преглед и процена од анестезиолог.  Принципот на операција е да се редуцира дотокот на крв во хемороидниот сплет од артериските крвни садови.

Методата  ХАЛ-РАР е минимално инвазивна процедура за третман на сите типови симптоматски хемороиди чија состојба не се подобрила со конзервативниот третман

Трансанално се внесува специјален тип доплер ултрасонографска сонда, со која се идентифицираат завршните гранки на хемороидните артерии. Рабовите се поставуваат во делот од цревото кое нема сензитивни нерви, поради што болката кај пациентите по операцијата е минимална. Најчесто се наоѓаат од 5 до 8 артерии, но  овој број варира од пациент до пациент во  зависност од анатомијата и степенот на пролапс на хемороидите. Вториот дел од процедурата е да се  коригира пролапсот на  мукозата и на субмукозата со затегнување на рабовите, а зафатот трае околу 60 минути. Пациентите по операцијата остануваат во болница еден ден, а голем број од оперираните можат да се вратат на секојдневните активности за неколку дена. Комплетно заздравување настанува по 6-8 недели. За тој период пациентите може да имаат печење при дефекација, повремени болки кои се смируваат со аналгетици, мало крвавење од местото на пласираните рабови, транзиторно нарушување со задржување на столицата и сл.