Стручно со д-р Симонида Котларова-Попоска: Во бременоста е полезно да се вежба, но мора да се слуша телото и предупредувачките сигнали

Жените во бременоста од физичката активност имаат полза, но сето тоа треба да биде внимателно и трудниците да го слушаат своето тело.

Пишува: Д-р Симонида Котларова-Попоска

Специјалист гинеколог-акушер


Користа од физичката активност за време на бременоста е добро позната. Но многу жени не знаат од каде да почнат или често се прашуваат дали танцувањето, аеробикот, пливањето, пешачењето и јогата, како и активностите како скијањето, правењето склекови и возењето велосипед се безбедни за време на бременоста. Жените во бременоста од физичката активност имаат полза, но сето тоа треба да биде внимателно и трудниците да го слушаат своето тело.

СЕДУМ ПРИДОБИВКИ

Од вежбањето за време на бременоста од физичката активност има многу придобивки, а ова се седум од нив.  

Зголемување на енергијата

Во бременоста жената може да се чувствува уморна и без кондиција, но регуларното вежбање може да помогне за полесно справување со секојдневните задачи и со напорниот дневен ред на обврски. Со секојдневното вежбање се зајакнува кардиоваскуларниот систем, така што трудницата нема да се заморува лесно, а со силни и тонизирани мускули ќе биде потребен помал напор за завршување која било активност, без разлика дали е тоа физичка активност или состанок во канцеларија.

Според Американскиот колеџ на гинеколози и акушери (АЦОГ), препорачано е 30-минутно вежбање секој ден, се додека трудницата нема медицинска состојба или компликација поради која нејзиниот лекар гинеколог кажал да се намали нивото на физичка активност.

Подобар сон

Наоѓањето добра положба за спиење за трудницата може да претставува голем проблем. Но со физичките вежби ќе се намали ексцесот на енергија и бремената жена ќе се замори доволно за да заспие лесно и да има добар сон по кој ќе се чувствува одморена.

Намалување на дискомфорот

Со нормална физичка активност се истегнуваат и зајакнуваат мускулите кај трудницата, со што нејзиното тело подобро се справува со болките во мускулите и во лигаментите за време на бременоста. Вежбите со истегнување ја олеснуваат болката во грбот, пешачењето ја подобрува циркулацијата, а пливањето ја зајакнува стомачната мускулатура кај трудницата, објаснува докторката.

Подготовка за породување

Во колку подобра физичка кондиција е бремената жена, толку посилна ќе биде за време на контракциите и породувањето. Подготовките за породување со помош на физички вежби можат да го олеснат и да го скратат времето на породување.

Помал стрес, поголем оптимизам

Со раѓањето на детето се менува целиот живот на родителите. Тоа е значајно искуство, вели докторката, кое прави жената да се чувствува обземена, како да е во екстаза, но и истовремено и анксиозна. Во една студија е докажано дека вежбањето ги зголемува нивоата на серотонин, хормон кој е одговорен за промени во расположението, поради што во организмот се постигнува состојба на смиреност и рамнотежа.

Подобра слика за себе

Гледајќи како секој месец од бременоста се зголемуваат килограмите, трудницата може да се обесхрабри. Но ако во бременоста не ја одбегнува физичката активност, освен ако мора, тогаш трудницата ќе се чувствува подобро и ќе знае дека добиените килограми се посакуван прираст на тежината во бременоста.

Враќање во нормала по породувањето

Да се врати телото во нормала по породувањето, само по себе, е мотивација за многу жени да практикуваат физички вежби во бременоста. Ако се одржуваат силата и мускулниот тонус за време на целата бременост, на телото ќе му биде полесно да се врати во нормала по породувањето.

 ДЕСЕТ ПРЕДУПРЕДУВАЧКИ ЗНАЦИ

Колку е корисно вежбањето, толку може да биде и опасно ако не се изведува правилно, соодветно на бременоста или ако е во претерана мера. Телото се менува за време на бременоста, променет е центарот на носење на тежината, бидејќи жената носи поголема тежина и трудницата полесно се заморува. Токму поради тоа мора внимателно да се вежба и притоа жената да го слуша своето тело, бидејќи тоа ќе и каже кога навлегува во опасната зона.

Меѓу најважните предупредувачки знаци и симптоми на кои мора да се внимава при вежбањето се:

Наусеа, мачнина

Тоа е знак дека во организмот има создадено повеќе млечна киселина која се создава како продукт на метаболизмот на мускулите. Ако мачнината продолжи и по прекинувањето со вежбање, тогаш трудницата треба да се јави кај својот гинеколог.

Вртоглавица

Ако трудницата има вртоглавица која трае или ако е придружена со заматен вид, главоболки и срцебиење, може да е симптом на силна анемија или друга сериозна болест која може да влијае на бременоста. Ако вртоглавицата продолжи и откако жената престанала со вежбање, тогаш таа треба да се јави кај гинеколог.

Нагло зголемување на телесната температура

Ако дланките на трудницата и станат лепливи или ако чувствува топли и ладни бранови, тогаш нејзиното тело кажува дека има проблем со терморегулацијата, што може да биде штетно за бебето. Ако температурата продолжи да се зголемува, итно треба да се оди кај гинеколог.

Срцеви палпитации

Ако бремената жена при вежбање останува без воздух и прекумерно се поти, најверојатно е дека границата на оптимално вежбање е помината. Ако пак, срцето на трудницата за време на некои вежби забрзано чука дури и кога ќе престанат, тогаш е неопходен лекарски преглед.

Отоци

Дланките и стапала трудницата може да ги чувствува отечени, но болките во екстремитетите може да се последица од тромбоемболизам, односно воспаление на вените поврзано со коагу`лацијата на крвта во нив. Ако по еден час од престанување на вежбањето не се намали отокот, потребен е лекарски преглед.

Вагинално крвавење

Дел од бремените имаат лесна сукрвица за време на бременоста, што е причина за нивна загриженост. Рано во бременоста тоа може да е знак за спонтан абортус, додека во вториот и третиот триместар крвавењето се поврзува со заканувачко предвремено породување и проблеми со постелката, како на пример плацента превија или плацентарна абрупција. Овие две состојби бараат итна медицинска помош.

Заматен вид

За време на вежбањето трудницата може да почувствува заматување на видот, што е знак на дехидратација, поради што паѓа крвниот притисок, па оттаму и срцето работи забрзано. Поради нискиот притисок бебето може да остане без доволно снабдување со крв. Заматениот вид може да е знак и на прееклампсија, состојба при која е нарушен протокот на крв низ постелката, што може да е опасно за бебето.

Кога гинеколошкиот преглед е итен

Колабирањето во текот на бременоста не треба да се сфати лесно. Може да се случи поради дехидратација како и поради сериозна состојба поврзана со големи проблеми во циркулациите. Мозокот останува без доволно кислород, што значи дека и бебето не го добива во доволно количество.

Остра повторувачка болка во стомак и во гради

Оваа болка може да е од банално истегнување на лигаментите, но е можно и трудницата да има контракции, особено ако болката е повторувачка во регуларни интервали. Притоа мора да се направи ЦТГ и да се верифицираат евентуалните контракции на матката. Овој симптом зборува за предвремено прскање на плодовите обвивки и е знак дека почнува породувањето. Треба веднаш да се појде кај гинеколог.