Бактериските инфекции се втора водечка причина за смрт во светот по срцевите заболувања, покажала опсежна студија објавена денес, во која Staphylococcus aureus (златен стафилокок) и пневмокок се споменуваат како две најсмртоносни бактерии.
Со студијата, чии резултати се објавени во списанието Lancet, селектирани се триесетина бактерии, најчести причинители на инфекции, а научниците се обиделе да проценат колку смртни случаи се поврзани со нив.
Истражувањето е спроведено како дел од таканаречениот “глобален товар на болести“.
Оваа голема истражувачка програма е од неспоредливи размери и вклучува неколку илјади истражувачи од многу земји во светот.
Авторите заклучиле дека “смртните случаи поврзани со проучуваните бактерии претставуваат втора водечка причина за смрт во светот“ по коронарните срцеви заболувања, меѓу кои се издвојуваат срцевите удари.
Од 7,7 милиони смртни случаи поврзани со бактериски инфекции, секој осми се припишува на последиците од зараза со златниот стафилокок и пневмокок. Овие податоци датираат од 2019 година, во време пред пандемијата со КОВИД-19.
Од триесетте селектирани бактерии, пет од нив предизвикуваат повеќе од половина од смртните случаи: staphylococcus aureus, Escherichia coli, pneumococcus, Klebsellia pneumoniae i bacillus pyocyanin.
Staphylococcus aureus е “водечка причина за смрт предизвикана од бактериска инфекција во 135 земји“, покажала студијата.Но, кај децата на возраст под пет години, пневмококните инфекции се најсмртоносни.
Истражувачите велат дека овие резултати се јасен показател дека бактериските инфекции се “итен приоритет“ во јавното здравство.
Оттаму повикуваат на ангажман за превенција од инфекции, помудро препишување на антибиотици, особено за да се избегне резистентноста на овие лекови, како и поефикасна употреба на вакцините.
