СВЕТСКИ ДЕН НА ХИПЕРТЕНЗИЈАТА: Дури 50 отсто од граѓаните не знаат дека ја имаат оваа ‘“подмолна болест“

За жал, речиси 50 отсто од лицата со хипертензија и не знаат дека имаат покачен крвен притисок, а половина од оние кои знаат, не преземаат ништо, односно не ги земаат потребните лекови и не ги менуваат животните навики.

По повод Светскиот ден на хипертензијата, 17 мај, лекарите предупредуваат дека од хипертензивни болести боледува една третина од населението, а дека околу 50 проценти од лицата со хипертензија и не знаат дека имаат зголемен крвен притисок.

Поради тоа и овогодинешниот Светски ден на хипертензијата се одбележува под мотото “Мери го својот крвен притисок, контролирај го и живеј подолго“.

Покачениот крвен притисок или хипертензијата (> 140/90) е тивка и подмолна болест која со години не мора да покажува симптоми се додека не се развијат оштетувања на органите. Хипертензијата претставува глобална епидемија и водечки ризик фактор за смртност на глобално ниво.

Речиси една третина од возрасната популација има зголемен крвен притисок кој е главен ризик фактор за кардиоваскуларни болести, особено коронарни болести на срцето и мозочен удар, но и за хронични болести на бубрезите, затајување на срцето, аритмија и деменција.

Според проценките, 18 проценти од сите смртни случаи на светско ниво може да се препишат на хипертензијата (околу 9,4 милиони луѓе).

Хипертензијата е потребно да се лекува, главно со лекови кои го намалуваат крвниот притисок, за да се намали ризикот од наведените исходи. Вредностите на крвниот притисок треба да се намалуваат под 140/90 mmHg, истакнуваат лекарите.

За жал, речиси 50 отсто од лицата со хипертензија и не знаат дека имаат покачен крвен притисок, а половина од оние кои знаат, не преземаат ништо, односно не ги земаат потребните лекови и не ги менуваат животните навики. Тоа значи дека 75 отсто од популацијата со покачен крвен притисок на светко ниво, има голем ризик за развој на болести на срцето, мозочен удар, болести на бубрезите и изненадна срцева смрт.

Мерењето на крвниот притисок е основа во поставувањето дијагноза и следење на ефектите на терапијата. Кардиолозите препорачуваат секој да го измери својот крвен притисок најмалку еднаш годишно, а лицата кои боледуваат од хипертензија, според препораките на лекарот.

Лекарите нагласуваат дека на ризиците може да се влијае и со промена на животните навики: намалување на внесот на сол, балансирана правилна исхрана, откажување од цигари, избегнување на прекумерно консумирање алкохол, редовна физичка активност, како и одрежување на нормална телесна тежина.

Светската здравствена организација проценува дека неправилната исхрана е одговорна за околу 50 проценти од хипертензиите, физичката неактивност за околу 20 проценти и прекумерната телесна тежина за околу 30 проценти од сите хипертензии.