Инфекцијата со новиот коронавирус кај голем број заразени пациенти проследена е и со стомачни проблеми. Со оглед на тоа во летниот период почести се стомачните вирози, многу е важно да се разликуваат симптомите кои упатуваат на КОВИД-19 од обична „стомачна настинка“ или евентуално труење.
Гастроентеролозите велат дека не е едноставно да се направи разлика, но сепак постојат извесни сигнали.
“Доколку КОВИД-19 е причината за појава на гастроинтестинални тегоби, најчесто се јавува и зголемена телесна температура, респираторни тегоби, малаксалост, губење на сетилото за мирис. Во случај на обичен вирусен гастроентеритис, овие придружни симптоми не постојат. Значи, за разликувањето е важна клиничката слика, епидемиолошките податовци, како и дополнителните дијагностички методи во случај на сомнеж на КОВИД-19“, истакнуваат лекарите.
Според една студија, која опфатила 206 хоспитализирани пациенти со лесна клиничка слика во Вухан, од нив 48 имале само дигестивни проблеми, 69 пациенти имале и дигестивни и респираторни симптоми, а преостанатите само респираторни проблеми.
Одредни студии укажуваат дека некои пациенти имаат дијареа и мачнина пред појавата на респираторни тегоби.
Според лекарите, терапијата со антибиотици може да предизвика стомачни проблеми.
“Тогаш станува збор за антибиотски колитис, но може да биде и колитис предизвикан од бактеријата клостридиум, па во врска со оваа ситуација, важна е заштитата на дигестивниот тракт со пробиотици“, потеницраат гастроентеролозите.
