Успешно направена првата трансплантација на срце во Македонија

Иако станувало збор за исклучително тешка и ризична интервенција,  мешаниот тим на кардиохирурзи, според сите медицински протоколи, успешно ја извел трансплантацијата.

Доцна синоќа во една од операционите сали на Клиниката за државна кардиохирургија, по 6 часа операција, беше направена првата трансплантација на срце во земјава. Иако станувало збор за исклучително тешка и ризична интервенција,  мешаниот тим на кардиохирурзи, според сите медицински протоколи, успешно ја извел трансплантацијата.

Според првичните информации, “новото“ срце на 54 годишниот пациент засега е во добра функција, и сите параметри се во ред.

“Трансплантацијата е успешна. Ова е голем ден за нас. Посебен по многу нешта. Би сакале најпрво да се заблагодариме на семејството на донорот. Да се донесе одлука да се даруваат органи во моментот кога го губите саканиот, е тешко. Незамисливо тешко. Потребно е многу сила, многу љубов и многу хуманост да мислите на нечиј туѓ живот во моменти кога знаете дека сте го изгубиле најблискиот. И за ова сме им бескрајно благодарни. Тие се се хероите на оваа приказна. Би сакал да им се заблагодарам на лекарите од јавното и приватно здравство, медицинските сестри, координаторите и сите оние кои тимски ја направија трансплантацијата. Ова е огромен успех за македонското здравство“, изјави министерот за здравство Венко Филипче.

Трансплантацијата на срцето ја изведоа проф. д-р Сашко Јовев, директор на Државната кардиохирургија и д-р Жан Митрев, заедно со д-р Васил Папестиев, д-р Марјан Шокаровски, д-р Ванѓел Здравески, д-р Кјутим Џелили, д-р Тања Анѓушева, д-р Никола Христов, д-р Стефанија Хаџиевска, д-р Надица Мехмедовиќ, д-р Весна Миташова, д-р Јасмина Илиевска, д-р Марија Гераковска и д-р Димче Славевски.

За целата интервенција да помине во најдобар ред, националниот координатор за трансплантација д-р Маја Мојсова Мијовска  со својот тим болнички координтори ја процесираа пациентката во мозочна смрт и ги направија сите лекарски, технички и административни подготовки за да може да се изведе трансплантацијата на срце.

Семејството на починатата пациентка, освен срце, подари и живот со донирање на двата бубрега на пациенти на дијализа.

Истовремено, од истата почината пациентка, беа донирани и двата бубрега, кои им беа трансплантирани на двајца пациенти со хронична бубрежна слабост кои со години биле на дијализа, на Клиниката за Урологија под раководство на д-р Сашо Дохчев, -др Александар Трифуновски, д-р Сотир Ставридис и д-р Јанчулев со тим лекари од клиниката.

Пациентите кои ги добија органите беа избрани од Националните листи за чекање за срце и бубрези според медицински утврдени криетриуми за совпаѓање кои ги изготви и со кои раководи Министерството за здравство.