Дебелината и трајно зголемениот крвен притисок, холестерол и зголемено ниво на шеќер во крвта веќе долго се поврзани со зголемениот ризик од срцев и мозочен удар, како и со смртност од овие причинители, вели истражувачот на студијата, проф. д-р Сеунг Ли од Корејскиот универзитет. Но, помалку се знaело за тоа што се случува кога тие метаболички фактори осцилираат, особено кога не се поставени дијагнози како шеќерна болест или хипертензија, вели проф. д-р Ли.
За потребите на ова истражување, тимот на проф. д-р Ли проучил користел податоци кои ги собрал од корејскиот систем за здравствено осигурување од 2005 до 2012 година од над 6,7 милиони луѓе кои дотогаш немале срцев удар, дијабетес, зголемен крвен притисок или зголемен холестерол. Сите тие во периодот на набљудување имале најмалку три здравствени прегледи и здравствен тим следел половина од нив во период од уште најмалку пет години.
Во текот на истражувањето забележано е дека 55 000 од нив починале, а над 22 000 имале мозочен удар, а 21 000 имале срцев удар.
Во споредба со лицата чија тежина, крвен притисок, холестерол и нивото на шеќерот не осцилирале, оние со најголеми варирања имале за три пати поголема шанса да починат во текот на истражувањето и над 40 % поголем ризик за срце или за мозочен удар.
„За пациентите би било мудро да избегнуваат постојано намалување или зголемување на тежината, за кардиоваскуларниот систем да биде здрав. Тоа никако не значи лицата со вишок килограми да се обесхрабруваат во обидот да ја намалат тежината, туку само треба да си постават остварливи цели за намалување на килограмите за да можат да ја одржуваат тежината и да го избегнат јо-јо ефектот. Добивањето на тежина претставува стрес за организмот што може да го зголеми ризикот за срцев или мозочен удар“, појаснува проф. д-р Ли.
Конечната цел не е одржување на дебелината, туку одржување на нормална телесна тежина во текот на целиот живот, потенцира тој.
