Министерот за здравство Венко Филипче со емотивна порака на своите колеги, лекари, медицински сестри, лаборанти и сите останати здравствени работници им го честиташе Светскиот ден на здравјето – 7. Април.
“ Во овие моменти исправени пред најголемиот здравствен предизвик ја водиме битката на нашата генерација. Коронавирусот од корен го смени нашето секојдневие и ќе направи трајни промени во нашите животи. Но, во оваа битка, вие сте хероите. Вашиот труд и пожртвуваност, спасуваат животи и токму заради вас луѓето веруваат дека ќе бидат безбедни и здрави. Сега здравството и здравствените работници се клучниот столб во државата. Знам дека во моментов носите огромен товар, заморот полека не стига сите. А, не чекаат уште тешки денови. Но, јас верувам дека секој од вас знае колку е важно да издржиме, да останеме посветени, концентрирани и да дадеме се од себе да им помогнеме на нашите сограѓани“, им порача министерот Филипче на сите свои колеги.
Тој побара од нив да грижат за себе и за своето здравје.
“Вие сте први на удар на вирусот и морате да се штитите, без исклучок. Штитете се на работното место, но и надвор од него. Грижете се за себе за да можете и понатаму да се грижите за пациентите. Овој ден е ваш ден, вие сте на пиедесталот. Бидете горди на тоа што го работите, на тоа кои сте и колку сте значајни за секој од нас. Ви го честитам денот на здравјето и здравствени работници искрено ви благодарам за се што правите да ја надминеме кризата“, рече ресорниот министер.
