Воведувањето триминутни прошетки со кои се „разбиваат“ циклусите на долготрајно седење посебно добро им делувале на постарите и дебели жени, наведуваат авторите на трудот објавен во магазинот „Hypertension“.
„Долготрајното седење е вообичаено однесување во модерното општество во кое буквално седиме при се што правиме“, вели авторот на студијата Мајкл Вилер од “Baker Heart and Diabetes Institute” во Мелбурн.
Неодамнешните истражувања покажале дека продолженото седење во текот на денот може да го зголеми крвниот притисок, што е клучен фактор за развој на срцеви болести. Иако и вежбањето и прекините на долготрајното седење можат секое за себе да го намалат зголемениот крвен притисок, Вилер сакал да анализира дали нивната комбинација ќе резултира со дополнителна корист за здравјето. Истражувањето опфатило 67 мажи и жени на возраст од 60 до 74 години со прекумерна телесна тежина, а 40 отсто имале зголемен крвен притисок.
На секој испитаник му се мерени бројот на отчукувања на срцето, крвниот притисок, шеќерот во крвта и други маркери во разни активности – од непрекинато осумчасовно седење, повеќечасовно седење со прекин и половина час одење на подвижна лента, повеќечасовно седење со прекин со триминутни „прошетки“ на подвижна лента на секои половина час. За време на седењето испитаниците главно читале и имале услов да одбегнуваат активности како што се гледање телевизија или водење телефонски разговори.
По добивање на податоците утврдено е дека во просек вклучувањето на каков било облик на движење во дневната рутина довело до намалување на притисокот од околу 1 mm/Hg. Најголемо намалување на притисокот кај сите е забележано кога испитаниците наутро вежбале 30 минути на подвижна лента. Како дополнување и триминутните прошетки, во текот на целиот ден, имале дополнително позитивно влијание кај жените. Кај нив нивото на адреналин – хормон кој го подига притисокот, било пониско во текот на денот кој вклучувал и вежбање.
„Бевме изненадени дека само кај жените е забележано дополнително намалување на крвниот притисок кога по утринското вежбање оделе на куси прошетки во текот на целиот ден“, рекол Вилер.
