Кога ќе се разбудите наутро за да ги „загреете“ мускулите на грбот и за да се подготвите за активен ден ви препорачуваме да одработите неколку основни вежби за истегнување. Додека лежите на грб, свиткајте ја во коленото едната нога (другата може да остане испружена или благо свиткана во коленото), подигнете го коленото кон градите и опфатете го со двете раце за да го засилите истегнувањето.
Задржете триесетина секунди, спуштете го стапалото на подот (или креветот) и повторете ја постапката со другата нога. Потоа двете колена истовремено подигнете ги кон градите, опфатете ги со рацете и во оваа поза останете триесетина секунди, а и повеќе, доколку ви годи истегнувањето.
Вежбите за истегнување би требало да ви годат – доколку почувствувате болка во кој било момент, престанете со истегнувањето.
Следна вежба за истегнување: легнете со испружени нозе, а рацете испружете ги над главата и положете ги на креветот. Наизменично истегнувајте ги најпрво десната нога и левата рака, а потоа левата нога и десната рака. Повторете 10 пати и задржете го секое истегнување по 5 секунди.
Потоа легнете на стомак, потпрете се за лактите и подигнете ги рамената и градите од креветот или подот. Дишете нормално и задржете ја оваа положба 30 секунди до неколку минути. Опуштете се и завршете со следната вежба: додека лежите на стомак, свиткајте ги рацете во лактите, а дланките положете ги на подот, под рамената. Потпрете се со рацете и поткренете го горниот дел од телото (рамена, гради, половина), а колковите држете ги на подор. Останете во оваа положба 30 секунди и потоа опуштете се.
