Хормоните на штитната жлезда може да имаат голем ефект врз кардиоваскуларниот систем, па така премногу активна штитна жлезда и неактивна штитна жлезда може да имаат лоши последици по срцето. Затоа е важно да се препознаат и двете работи да се лекуваат, се наведува во најновата студија објавена во стручното списание American Heart Association News.
Штитната жлезда сместена во подножјето на вратот, ослободува хормони кои го регулираат метаболизмот и влијаат на секој орган, па така и на срцето. Кога телото произведува премногу хормони на тироидеата, резултатот е хипертиреоза, која може да предизвика неправилна работа на срцето што за последица може да има создавање на крвни згрутчувања, мозочен удар и затајување на срцето, како и остеопороза и други проблеми.
Хипотиреозата, при која штитната жлезда не произведува доволно хормони е многу почеста и може да доведе до побавно отчукување на срцето, стеснување на крвните садови, покачен крвен притисок, задржување на течности и зголемување на нивото на холестерол.
Абнормалностите на функцијата на тироидната жлезда обично се откриваат преку крвни тестови. Бидејќи срцевите заболувања и проблемите со тироидната жлезда се поврзани, лицата со срцеви проблеми кои имаат од неправилни отчукувања на срцето до висок холестерол и срцева слабост треба рутински да подлежат на преглед на работата на тироидната жлезда.
Исто така, треба да се обрне внимание на симптомите кои укажуваат на нарушена функција на тироидната жлезда. Симптомите на хипотироидизам или хипотиреоза вклучуваат замор; зголемување на телесната тежина; нетолеранција на студ; болки во зглобовите и мускулите; запек; и сува, кршлива коса. За хипертироидизам или хипертиреоза, симптомите вклучуваат губење на телесна тежината и покрај зголемениот апетит; забрзана или неправилна работа на срцето; нервоза или раздразливост; мускулна слабост; и нетолеранција на топлина.
