Научниците утврдиле дека постои врска меѓу високото ниво на тестостерон кај мажите и создавањето крвни згрутчувања, срцев удар и откажување на работата на срцето. Истото важи и за мажите кои земаат суплементи со тестостерон со цел да го зголемат нивото на енергија и сексуална желба, предупредуваат. Сепак, научниците не успеале со сигурност да утврдат дека тестостеронот е директен причинител на срцеви проблеми, заради што се најавуваат понатамошни истражувања.
Инаку, ова истражување е спроведено на Универзитетот во Њујорк и Универзитетот во Хонг Конг, а биле анализирани податоци на 400 000 мажи и жени на возраст од 40 до 75 години.
Тимот на научници предводен од професорката Мери Шулинг им пристапил на гените кои го покажуваат нивото на тесотостерон и нивната врска со срцевите проблеми. Проблемите со срцето биле анализирани врз основа на извештаите на учесниците во студијата и нивните податоци од прегледите. Резултатите покажале дека кај мажите високото ниво на тестостерон има јасна врска со зголемениот ризик од создавање крвни згрутчувања и престанок на работата на срцето. Оваа врска била помалку очигледна кај жените, кои инаку имаат пониско ниво на тестостерон. Научниците утврдиле дека тестостеронот е „штетен за тромбоемболија, откажување на работата на срцето и инфаркт на миокардот, особено кај мажите.“
