Косата добива боја со помош на меланинот, истиот пигмент кој ја одредува бојата на кожата и очите. Меланинот со годините постепено се губи, заради што со време косата побелува, за подоцна и цела да обели, тврдат експерти од Американската академија за дерматологија.
Косата опаѓа и расте нова, а клетките кои го произведуваат пигментот во влакната одново се придвижуваат, меѓутоа како старееме тие на одреден начин слабеат и оваа функција ја извршуваат побавно.
Но, може ли стресот да го забрза овој процес? Дали тој е заслужен за слабеењето на меланинот?
Стресот е познат и докажан причинител за зголемено и нагло опаѓање на косата, но ниту едно истражување всушност не докажало дека стресот е виновен за нагло белеење на косата. Исто така, научниците тврдат дека постои конекција, но не игра некоја значителна улога. Научниците тврдат дека е невозможно косата да побели преку ноќ, што во некои ситуации се случува, па ова неретко се поврзува со стресот.
Исчезнувањето на меланинот од влакното подразбира одреден временски процес, иако не е видлив, тој трае, а видливи резултати доаѓаат на самиот крај: влакната стануваат бели, губејќи го пигментот.
Во повеќето случаи, за бела коса може да ги обвините своите родители, не стресот. Генетиката игра најголема улога. Всушност, научниците откриле и кој ген е заслужен за појава на седа коса, тоа е ИРФ4.
Сепак, постои нешто што може да ја забрза појавата на бели влакна – тоа е пушењето. Една студија покажала дека постои поврзаност меѓу пушењето цигари и појавата на бели влакна пред 30.години. Пушењето и стресот секако може да влијаат на рана појава на бели влакна, но тие никако не ја предизвикуваат оваа појава, тврдат научниците.
