Витамин Б6 е еден од најважните витамини во организмот. Важен е за формирањето на аминокиселините, а со тоа и на протеините. Витаминот Б6 е потребен за работата на мозокот и централниот нервен систем, производство на одредени невротрансмитери (на пример, серотонинот), правилно работење на мускулите, производство на некои хормони (адреналин и допамин), производство на хемоглобинот во црвените крвни зрнца, електролитна рамнотежа во телото, развој и раст на фетусот и новороденчето… А научниците тврдат дека може да ни помогне и за поквалитетен сон, поточно да се сеќаваме на она што сме го сонувале без да имаме дупки во сеќавањето. Земањето на витаминот Б6 пред спиење им помогнало на некои луѓе да се сеќаваат на своите сонови.
Истражувачите од Универзитетот Аделаида набљудувале група испитаници од кои половината земала витамин Б6 пред спиење, додека останатите земале плацебо. Оние кои пиеле витамин Б6 истакнале дека нивните соништа биле појасни и полесно ги запаметиле и не ги загубиле сеќавањата подоцна во текот на денот.
Авторот на истражувањето Денолм Аспи открил дека витаминот Б6 не влијаел на тоа луѓето да сонуваат луцидни соништа. Тој додал дека ова е прв пат некој да се бави со проучување на влијанието на витаминот Б6 и другите витамини на соништата.
Витаминот Б6 го има во храната како што се житарките, леќата, бананите, авокадото, спанаќот, доматите, млекото, сирењето, јајцата, црвеното месо и рибата. Во поголеми количини се наоѓа и во лебниот квасец, гравот, сојата и други градинарски растенија, а меѓу продуктите од животинско потекло во најголеми количества го има во црниот дроб, бубрезите, месото, млекото и жолчката од јајце.
Делување
Без витамин Б6 нема протеини, без протеини нема хормони, а без хормони сите функции во организмот се доведени во прашање. Да ги спомнеме само серотонинот, допаминот и мелатонинот, кои заедно го регулираат биолошкиот часовник, спиењето, когнитивната функција, чувствата и однесувањето. Витаминот Б6 учествува во изградбата на неколку невротрансмитери (материи кои овозможуваат пренос на нервните импулси). Недостатокот на витаминот Б6 доведува до невролошки и психолошки пореметувања.
