Настинката е поблага вирусна инфекција која трае најмногу една недела, а се манифестира со кивање, течење или затнат нос, болка во грлото и главоболка. Вирозата во поретки случаи може да се јави во форма на ентеровироза со дигестивни пречки, додека најчесто ги зафаќа респираторниот систем со симптоми како ринитис, болки во грлото и целото тело, како и зголемена телесна температура.
Иако, многумина посегнуваат по антибиотици за да што побрзо се ослободат од настинката, тие не претставуваат соодветна помош освен ако со вирусната, не се развие и бактериска инфекција.
Лекувањето на настинката и вирозата најчесто се сведува на зајакнување на одбранбениот механизам и ублажување на симптомите, без разлика што тие обично по 5-10 дена и сами се повлекуваат. Важно е да се одржува здрав и силен имун систем во вид на превенција од болести, односно за да подготвено одговори на нападот на инфекција. Најдобар начин за тоа е консумирање на добро избалансирана исхрана, редовно умерена телесна активност, избегнување на стрес и нагло слабеење, како и обезбедување на квалитетен сон. Но, доколку не сме успеале да го заштитиме организмот од настинка, постојат многу намирници кои може да го забрзаат оздравувањето и да помогнат тие неколку дена полесно да се поднесат.
Антибиотикот е лек кој делува само на бактерии, не и на вируси и затоа треба да се сфати дека антибиотиците не треба да се земаат самоницијативно, без лекарски рецепт, како ни за секоја настинка.
Според лекарите, инфективните болести се интригантни и имаат динамичен развој, што претставува предизвик за оние кои во првите часови на болеста не можат да проценат дали инфекцијата изискува антибиотик или не. Но, тие велат дека пред да се препише антибиотик треба да се причека еден дена да се види во која насока се развива болеста и притоа е пресудна и општата состојба на пациентот.
