Витаминот Ц (аскорбинска киселина) е антиоксидант и важен фактор во имунолошките реакции, учествува во создавањето на колаген, кој е неопходен во процесот на градење коски, заздравување на рани и скршеници, одржување на цврстината на крвните садови итн. Овој витамин е важен фактор за деактивирање на слободните радикали кои се создаваат со метаболните реакции и создавање енергија во телото. Дополнително, слободните радикали влегуваат во телото од загадена средина, чад од тутун, но и со интензивна работа на мускулите, како што е случајот со рекреативците и професионалните спортисти.
Тие ги оштетуваат еритроцитите, па затоа е важно антиоксидативното дејство на витаминот Ц, кој помага да се зачува интегритетот на црвените крвни зрнца и да се спречи анемија. Потребата на организмот за витамин Ц се зголемува во текот на годините на човековиот раст и созревање. Така е и кај трудниците, доилките и пушачите. Со оглед на тоа што витаминот Ц е растворлив во вода и неговиот вишок се излачува преку мокрење, предозирањето преку храната е релативно ретко.
- Каде се наоѓа?
Витаминот Ц го има во цитрусите и нивните сокови, пиперката, брокулата, кељот, киселата зелка, прокељот, карфиолот, зелената салата, јагодите и дињите, доматите, аспарагусот, прехранбените производи збогатени со овој витамин (на пр. житарки за појадок) итн. Содржината на витаминот Ц во храната се намалува со нејзино долготрајно складирање и готвење.
- Недостаток на витамин Ц
Балансираната и разновидна исхрана обезбедува доволна количина на овој нутриент. Недостатокот е присутен кај луѓе чиј внес на овошје и зеленчук е многу ограничен. Покрај тоа, може да се појави и со некои здравствени проблеми кога апсорпцијата на хранливи материи во дигестивниот систем е полоша. Знак за сериозен недостиг на витамин Ц е пред се воспалението и крварењето на непцата кои ќе ги забележите наутро додека ги миете забите. Присутни се и замор, болки во зглобовите, бледа кожа, чести настинки и главоболки и лошо зараснување на раните. Исто така неретко се појавуваат и депресија, губење на забите, анемија итн.
