За мажите: Пет симптоми поради кои треба да отидете на лекар

Често чешањето е само чешање, а болката во мускулите е само тоа. Но, кога симптомите траат долго или почнувате да забележувате некои обрасци по кои се јавуваат, можеби телото ви дава знак дека се случува нешто посериозно.

Еве неколку симптоми поради кои секогаш треба да отидете на лекар:

 

Промена на кожата која не поминува

Можеби ќе помислите дека е само мозолче кое не поминува или нова бенка, но неправилност на кожата може да биде карцином на базалните клетки, форма на рак на кожата која ги погаѓа мажите и тоа два пати почесто од жените, истакнуваат дерматолозите.
“Следете го грбот, врвовите на ушите, капаците и темето на главата, особено ако подолго време сте на отворено. Ракот на базалните клетки нема тенденција на на брзо метастазирање како меланомот, но колку подолго го одложувате отсранувањето, толку проблемот станува посериозен“, вели д-р Витни Бови, дерматолог од болница во Њујорк.

Проблеми со мокрењето

Одеднаш морате да станувате и повеќе пати во ноќта да уринирате или се чувствувате како да треба, а млазот урина е послаб или мокрењето е болно.
Често причина за тоа е зголемената простата. Според д-р Рајан Берглунд од клиниката Кливленд, проблемите со мокрењето може да упатуваат и на други проблеми, како дијабетес или во некои случаи и рак на простата.

Проблеми во спалната соба

Секој маж кој изненадно почувствува проблеми при сексуалниот однос, треба да посети лекар, и тоа не само за да добие рецепт за лек за зголемување на потенцијата.
Немојте да претпоставувате дека сте премлади за еректилна дисфункција: околу една четвртина од мажите со овој проблем се на возраст од 40 години и помлади. Некогаш се јавува поради стрес и лоши навики, како пушење и алкохол, но еректилната дисфункција може да биде и ран показател на кардиоваскуларни проблеми.

Депресија

Мажите често не ги прикажуваат јасно симптомите на депресија, а може да бидат и лути, наместо да се повлечат и да се чувствуваат тажно. Малку е веројатно дека ќе побараат стручна помош или лекови за тоа. Ниското ниво на витамин Б12 и Д се поврзани со депресијата, а хроничната болка и болестите може да нидат поврзани со психичката состојба на мажот.

Кашлица која не поминува

Константно суво кашлање кое трае четири недели и подолго, или честа засипнатост може да бидат знак за гастроезофагеална рефлуксна болест – ГЕРБ. Ако во текот на годините не се провери, ГЕРБ може да предизвика рак на хранопроводот, а сувата кашлица може да сигнализира и на астма, или поретко на рак на бели дробови или затајување на срцето.