За прв пат научници ја пресметаа брзината на умирање на една клетка

Проучувајќи ги јајце клетките кај жаби, биолозите Ченг и Ферел ја измериле брзината на апоптозата или “програмираната смрт на клетките“.

Научници од Универзитетот Станфорд објавија студија во списанието Science, во која успеале за прв пат да ја пресметаат брзината со која смртта се движи кон клетката. Тие успеале буквално да гледаат како смртта патува кон клетката и се движи со брзина од 0,03 милиметри во минута.

Двајцата системски биолози Хианруи Ченг и Џејмс Ферел се всушност првите научници кои откриле со каква брзина се движи смртта кон клетките. Ова откритие, кое покажува и како клетките умираат, според нив, ќе биде од голема корист во понатамошниот развој на медицината. На пример, додаваат тие, научниците ќе можат да ги “охрабрат“ клетките на ракот да се убиваат или да спречат изумирање на клетките кај пациентите со Алцхајмерова болест.

Проучувајќи ги јајце клетките кај жаби, Ченг и Ферел ја измериле брзината на апоптозата или “програмираната смрт на клетките“. Станува збор за механизам со кој клетките активно ја покренуваат сопствената смрт како составен дел од физиолошкиот процес или како одговор на бројни внатрешни и надоврешни фактори. Понекогаш клетката, потенцираат двајцата биолози, самата чувствува дека е време да се откаже, додека на самоуништување понекогаш ја поттикнуваат бранови на хемиска активност. Научниците велат дека ја измериле брзината и на тие бранови.