Се повеќе лица, кои го прележале коронавирусот бараат лекарска помош поради појавата на постковид синдром, предупредуваат лекарите, нагласувајќи дека два најчести симптоми кои се јавуваат кај пациентите е чувството на немање воздух и хроничен замор.
Според стручњаците, периодот од два до три месеци од првите симптоми на болеста КОВИД-19 се нарекува долг или продолжен КОВИД-19, а ако симптомите траат подолго од три месеци од почетокот на болеста, тогаш тоа по дефиниција е постковид.
Два најчести симптоми поради кои пациентите се јавуваат на лекар се чувството на недостаток на воздух, диспнеа и хроничен замор. Од останатите симптоми, лекарите ги истакнуваат и невролошките пореметувања – голем процент на пациенти се жалат на главоболка, вртоглавица, трнење во рацете и нозете, мускулна слабост, тремор. Во делот на когнитивни тегоби се отежнато помнење, неможност за изговарање одредени зборови.
“Многу голем број на болни имаат анксиозни симптоми во смисол на нагласена вознемиреност, некаков страв, што всушност и не може единствено да се поврзе со КОВИД-19, туку и со други животни моменти“, нагласуваат лекарите.
Тие велат дека најважно е пациентите кога имаат недостаток на воздух, веднаш да исконтактираат со лекар, оти најважно е континуирано следење и проценка кога е време за некои поинвазивни тераписки опции.
“КОВИД-19 денес и пред една година за нас лекарите не е иста болест. На некој начин, многу сме поблизу на оваа болест, можеме многу нешта да предвидиме и навистина постои одреден клинички образец на однесување на болните уште во рана фаза, па и во текот на хоспитализацијата. Едно е сигурно, а тоа е дека респираторните симптоми најчесто се јавуваат од петтиот до десетиот ден на болеста“, објаснуваат експертите.
