ЗАМОР, БОЛКИ ВО ЗГЛОБОВИТЕ, СЛАБОСТ ВО МУСКУЛИТЕ: Ова се знаци дека ви недостасува витамин Д

Изненадувачки голем број луѓе страдат од недостаток на витамин Д, особено во зима, а можени и самите не сте свесни за овој проблем. Еве како можете да препознаете недостаток на овој важен витамин.

Во зима често е облачно и не поминуваме многу време надвор како во другите периоди од годината. Токму од оваа причина на многумина во текот на студените месеци често им недостасува витамин Д – еден од најважните витамини за здравсјето на организмот. Недостатокот на витамин Д е особено чест кај европското и азиското население.

Секако, најлесниот начин да се поттикне производство на витамин Д во телото е изложувањето на сонце – благодарение на УВ зраците хормонот се произведува во кожата. Се смета дека е доволно 15-30 минути на сонце да се произведе доволна количина. Меѓутоа, постојат други начини за одржување на нивото на витамин Д во телото, како преку исхрана, така и преку додатоци на исхраната – суплементи.

Повеќето луѓе имаат дневна потреба од 600 до 800 IU витамин Д, но на некои им е потребна поголема доза. Ова се однесува на лицата кои ретко излегуваат, постарите лица и оние кои страдаат од одредени болести како што се нарушувања на црниот дроб или малапсорпција.

  • Што е и која е функцијата на витаминот Д?

Витаминот Д опишува група витамини растворливи во масти која ги вклучува витамините Д2 и Д3. Има важна улога во неколку метаболички процеси, но неговата најпозната функција е тоа што е вклучен во метаболизмот на коските. Ја подобрува апсорпцијата на калциум и фосфор од цревата и нивно инкорпорирање во коските. Освен тоа, витаминот Д го одржува здравјето на срцето и кардиоваскуларниот систем и тироидната жлезда, помага во намалување на воспаленијата и борба против инфекции.

  • Кои се последиците од недостаток на витамин Д?

Ако не се преземе ништо во врска со недостатокот на витамин Д, во најлош случај може да дојде до болести на метаболизмот на коските (рахитис, остеопороза, остеомалација) поради декалцификација и последователно омекнување на коските. Но, можно е и слабеење на виличната коска и зголемена тенденција за периодонтитис (хронична пародонтална болест). Меѓутоа, во последниве години, исто така, се пронајдени врски помеѓу недостаток на витамин Д и високиот крвен притисок, дијабетес, фибромијалгија и невролошки заболувања како што е мултипла склероза.

КОИ СЕ СИМПТОМИТЕ НА НЕДОСТАТОК НА ВИТАМИН Д?

За да откриете дали имате недостаток на витамин Д, треба да направите крвна анализа кај вашиот лекар и да побарате соодветен совет. Меѓутоа, постојат некои симптоми кои може да се земат како предупредувачки знаци и веднаш можат да откријат дали имате недостаток.

ЗАМОР

Еден од најчестите симптоми на изразен недостаток на витамин Д е чувството на хроничен, општ и постојан замор. Но, овој симптом не треба да се меша со вишок на витамин Д, бидејќи се случува и обратното, постојано да сме уморни кога нивото на витаминот Д е превисоко. Токму поради оваа причина е важно секогаш да се зема додаток во исхраната витамин Д под надзор на лекар и по крвни анализи.

БОЛКИ ВО МУСКУЛИТЕ И СЛАБОСТ НА МУСКУЛИТЕ

Голем број на студии покажале поврзаност помеѓу честите болки во мускулите и мускулната слабост, како и недостатокот на витамин Д. Доколку ви се случат вакви епизоди, а не можете да разберете зошто, обратете се кај вашиот лекар.

БОЛКИ ВО КОСКИТЕ ИЛИ ЗГЛОБОВИТЕ

Бидејќи витаминот Д, како што е веќе споменато, е неопходен за апсорпција на калциум во телото, може да се појават симптоми како болки во коските и зглобовите и нивната зголемена кршливост.

ГУБЕЊЕ НА КОСАТА

Витаминот Д е важен за здрава и убава коса и за нејзин побрз раст. Недостатокот на овој витамин може да доведе до губење на косата и забавен раст, бидејќи животниот циклус на фоликулот е нарушен. Алопеција (целосно губење на косата и влакната на телото) е исто така поврзана со недостаток на витамин Д. Меѓутоа, почесто опаѓањето на косата е предизвикано од генетски и хормонални причини.

ЧЕСТО СТЕ БОЛНИ

Недостатокот на витамин Д често резултира со ослабен имун систем. Значи, ако често се разболувате и не знаете зошто, причината може да биде недостаток на витамин Д.

ДЕПРЕСИЈА, АНКСИОЗНОСТ, ПРОМЕНИ НА РАСПОЛОЖЕНИЕТО И ПРОБЛЕМИ СО СПИЕЊЕТО

Иако не постојат студии и истражувања кои утврдуваат директна врска помеѓу витаминот Д и депресијата, науката знае дека организам со недостаток на витамин Д функционира полошо. Ова на почетокот може да доведе до замор, а потоа и до психолошки и хормонски проблеми.