ЗАСТРАШУВАЧКО ОТКРИТИЕ: Коронавирусот предизвикува оштетувања на мозокот и нервите кај пациенти со умерена клиничка слика на инфекцијата

Британска студија открила дека инфекцијата со новиот коронавирус предизвикува оштетувања на нервниот систем.

Новиот коронавирус може да предизвика оштетувања на нервниот систем, тврдат авторите на студијата на невролошките компликации забележани кај пациенти заболени од КОВИД-19. Тие истакнуваат дека невролошките проблеми биле први и главни симптоми на заразата со коронавирусот кај некои пациенти и ги предупредуваат лекарите да обрнат внимание на тоа.

“Лекарите можеби не се свесни за симптомите на сериозните и потенцијално смртоносните оштетувања на мозокот предизвикани од КОВИД-19, кои се јавуваат меѓу поблагите случаи на заразата или кај пациентите кои се опоравуваат од болеста“, предупредуваат научниците.

Невролозите вчера во списанието Brain објавија студија за компликациите забележани кај над 40 пациенти заболени од КОВИД-19 во Велика Британија, кои варираат од воспаление на мозокот и делириум до оштетувања на нервите и мозочен удар.

Во некои случаеви, невролошките проблеми биле први и главни симптоми на КОВИД-19. Авторите на студијата откриле пораст на акутниот дисеминиран енцефаломиелитис (ADEM), болест опасна по живот, откако првиот бран на пандемијата ја зафатила Велика Британија. Пред пандемијата, во текот на еден месец бил евидентиран само по еден случај на оваа болест, додека во април и мај, бројот на поврдени заболени од ADEM на неделно ниво, изнесувал 2-3.

Студијата покажува дека воспаление на централниот нервен систем имале 12 паценти заразени со коронавирус, болест на мозокот со делириум или психоза имале десетмина пациенти, осум болни имале мозочен удар, а останатите имале проблеми со перферниот нервен систем, главно Гиен-Бареов синдром, автоимуно заболување кое ги напаѓа нервите и предизвикува парализа, а кое доведува до смртен исход во пет отсто од случаевите.

Проф. Мајкл Занди, водач на истражувачкиот тим тврди дека начинот на кој коронавирусот го напаѓа мозокот не е виден кај другите вируси. Тој истакнува дека ADEM има одредени сличности со мултипла склерозата, но е многу посериозен, а лицата од оваа болест често заболуваат изненадно. Некои  пациенти поради оваа болест може да стекнат траен инвалидитет, додека други може да се опорават без последици.

Коронавирусот кај некои пациенти оставил долгорочни последици и по излекувањето, како што се краток здив, замор, вкочанетост на мускулите, слабост и проблеми со помнењето.

Проф. Занди истакнува дека тимот кој стои зад ова истражување сака лекарите ширум светот да бидат свесни за овие компликации од КОВИД-19. Тој вели дека КОВИД-19 негативно влијае на мозокот, но потребно е да се спроведта дополнителни истражувања на оваа тема, кои до сега се многу малку, со оглед на тоа дека многу пациенти и се премногу болни за да одат на скенер на глава и други испитувања.

Овој научник е загрижен дека коронавирусот би можел да доведе до благо оштетување на мозокот кај одреден процент од популацијата, кое би станало видливо дури во наредните години.