Повредите поврзани со користењето мобилни телефони се во пораст, особено кај младите луѓе, покажува анализата на повреди поради кои луѓето најчесто бараат лекарска помош во САД. Во драматичен пораст се бројот на повреди на вратот, лицето, очите, носот, ушите и главата, а голем удел во тоа има користењето на мобилните телефони, особено пишувањето пораки при возење или одење, најмногу меѓу младите луѓе на возраст меѓу 13 и 29 години, пренесува Си-ен-ен.
Најчести повреди се рани на лицето и главата, потоа контузии на мозокот, површни повреди на кожата и повреди на внатрешните органи, се вели во истражувањето спроведено од научници од медицинскиот факултет Ратџерс во Њу Џерси.
Повеќето луѓе, 94 проценти, не биле хоспитализирани откако им биле санирани повредите, па можеби и затоа на многумина се им делува безопасно. Но, авторите на истражувањето предупредуваат дека всушност истите може да имаат долготрајни последици, како на пример лузни.
Трошоците за санирање на повреди на лицето го чинат здравствениот систем на САД околу 3 милијарди долари годишно. Оваа студија, чии резултати беа објавени во стручно списание, е прва која ги проучува повредите на главата и вратот, наместо целото тело. Интересно е дека ваквите повреди биле драстично поретки до 2007 година, кога „Епл“ го претстави првиот паметен телефон „ајфон“. Иако и претходно популарноста на мобилните телефони беше во пораст, факт е дека нивните карактеристики беа ограничени и затоа немаше голема веројатност да го одвлечат вниманието на корисниците во споредба со денешните смартфони.
