Франција стана првата земја во светот која воведе забрана за импланти за гради кои се поврзуваат со редок вид рак на имунолошкиот систем. Со забраната се опфатени неколку вида импланти со рапава површина, а кои ги произведуваат шест произведувачи и кои се поврзуваат со вид рак на имунолошкиот систем, пренесува Би-би-си.
Како што се наведува, се верува дека околу 70 000 жени ги вградиле овие забранети импланти од вкупно околу 400 000 во Франција кои се подложиле на овој зафат. Донесената забрана претставува мерка на претпазливост, воведена заради „ретката, но сериозна опасност“ која ја предизвикуваат имплантите, соопштила Националната агенција за лекови и здравствени производи.
Агенцијата навела дека се забележани 59 случаи на рак меѓу жените кои вградиле импланти, а од нив три умреле.
„Колку е порапав имплантот и груб, толку е поголем ризикот од добивање рак“, навела Агенцијата и додала дека не постои научно објаснување за појава на болеста, но се вршат испитувања. Истовремено на жените им се советува да не одат на операција на отстранување на имплантите затоа што ризикот од заболување и покрај се е мал.
