Знаете ли колку кофеин внесувате секој ден?

Чувствителноста на кофеин е генетски условена, така што некои луѓе можат да испијат значително повеќе кафе.

Кофеинот е стимуланс кој го има во голем број напитоци – од кафе и чај, преку газирани напитоци до енергетски пијалаци. Дневниот внес на кофеин не би требало да премине 400 мг, додека оваа граница е пониска за трудниците и изнесува 200 мг.

Треба да се знаат границите на количествата на кофеин во популарните напитоци, на пример, во една доза еспресо има 75-100 мг кофеин, во филџан инстант кафе околу 60 мг, во 330 мл кока-кола околу 32 мг, а во чаша енергетски напиток околу 80 мг. Кога станува збор за чајот, шола црн чај обично содржи од 50 до 79 мг, додека во истото количество зелен чај има 30-40 мг кофеин.

Интересно е дека истражувањата покажале дека чувствителноста на кофеин е генетски условена, така што некои луѓе можат да испијат значително повеќе кафе и други напитоци со кофеин, а да не почувствуваат какви било неповолни ефекти. Од друга страна, луѓето кои не се навикнати на кофеин можат негативно да изреагираат и на умерено количество кафе.

Некои од најчестите несакани симптоми кои се јавуваат се нервоза, несоница, умор, дигестивни тегоби, зголемен крвен притисок и забрзан пулс.