Исклучително болна состојба на „стврднување“ на кожата, а која потоа предизвикува тешки оштетувања на внатрешните органи – се вика склеродерма. Ова е системска болест на сврзното ткиво која се карактеризира со дегенеративни и воспалителни промени кои доведуваат до затегнување, задебелување, фиброза на кожата и до оштетувања на внатрешните органи, особено срцето, белите дробови, бубрезите и гастроинтестиналниот тракт.
Лек за оваа болест не постои, а се смета дека три фактори најмногу влијаат на појавата на склеродерма – промена на метаболизмот на колагенот, васкуларни промени и имунолошки промени.
СИМПТОМИ
Симптомите варираат од помалку сериозни до тешки, и се бројни.
- бледи и модри прсти;
- отоци и чувство на затегање на прстите или целите дланки;
- вкочанетост на зглобовите;
- постепено затегање и задебелување на кожата;
- хипер или хипопигментација;
- околу устата се јавуваат бразди;
- промени на лицето (се намалува усниот отвор, носот се издолжува, а очите стануваат ситни – птичји изглед)
- во кожата и поткожното ткиво се јавуваат калцификации;
- мускулна слабост;
- пореметување на голтањето;
- киселина;
- хематемеза (повраќање крв);
- крв во столицата;
- пореметување на дишењето проследено со кашлица, рестриктивни и опструктивни пречки;
- воспаление на срцевото ќесе;
- миокардијална фиброза;
- жолтица;
- зголемен црн дроб;
- невролошки промени и анемија.
