Знаци кои упатуваат на рак, а кои мажите не смеат да ги игнорираат

Често симптомите на ракот може да наликуваат на симптоми на други неопасни болести, што може да доведе до задоцнето дијагностицирање. Во продолжение ќе прочитате кои се знаци на карцином кои што мажите често ги игнорираат, а не би смееле.

Ракот е хронична болест која може да се појави кај секого. Во зависност од годините, гените и животните навики, веројатноста за рак може да се зголеми. Според Светската здравствена организација, ракот е втора водечка причина за смртност во светот. Додека ракот на дојка, бели дробови, грло на матката и штитната жлезда се почести кај жените, ракот на бели дробови, простата, желудник и црн дроб се почести типови карцином кај мажите.

Често симптомите на ракот може да наликуваат на симптоми на други неопасни болести, што може да доведе до задоцнето дијагностицирање. Во продолжение ќе прочитате кои се знаци на карцином кои што мажите често ги игнорираат, а не би смееле.

Промени на тестисите

Мажите мораат често да ги контролираат своите тестиси за да не дојде до промени во големината, бојата или текстурата. Како што од жените се бара редовно да ги проверуваат своите гради, така и мажите треба да го прават истото со тестисите. Доколку забележите дека едниот или двата тестиси ја промениле големината или почувствувате грутка/јазол, тоа не смеете да го игнорирате и треба да побарате лекарска помош. Тоа може да биде знак за рак на тестиси.

Промени на кожата

Ракот на кожа поинаку се манифестира кај мажите и жените. Иако се чини дека е почест кај жените, според Американското здружение на дерматолози, мажите почесто умираат од меланом од жените. Затоа е многу важно да се забележат било какви промени на кожата бидејќи тоа може да биде и нешто повеќе од само изгореница од сонце. Поради тоа, ако забележите необично крварење или болка или ако откриете необични пеги и брадавици, обратете се кај дерматолог.

Потешкотии со уринирањето

Потешкотиите со мокрењето може да сигнализираат дека постојат некои бегнини проблеми. Сепак, ако се појавуваат во комбинација со крв во урината или семената течност, како и болка и чувство на нелагодност проследени со еректилна дисфункција, тоа може да биде знак за рак на простата кој може да биде опасен по живот ако на време не се лекува.

Хронична кашлица

Хронична, постојана кашлица може да значи многу. Но, ако трае три недели или подолго, а не сте настинати и немате симптоми на алергија, тоа може да укажува на рак на белите дробови. Ако имате придружни симптоми како што се пискање при дишење, отежнато дишење, засипнатост или искашлувате крв, веднаш контактирајте го вашиот лекар.

Ранички во устата

Сите сме имале болни ранички во устата, но со текот на времето тие сами зараснале. Меѓутоа, ако развиете рани во устата (афти) кои не заздравуваат и доведуваат до постојана болка и оток, ова може да укажува на одредени видови на рак на устата. Лицата кои пушат треба да обрнат посебно внимание на овие работи.

Проблеми со голтањето

Отечено и болно грло секому му е познато како еден од симптомите на коронавирус, но ако се продолжи, не престанува неколку недели и ви го отежнува голтањето на храната – јавете се на лекар и тестирајте се за рак на грло, желудник или бели дробови.

Постојан замор

Заморот може да биде симптом на речиси секоја болест. Дури и обична настинка може да го намали вашето ниво на енергија. Меѓутоа, ако сте уморни повеќе од еден месец или чувствувате недостаток на здив, посетете лекар кој ќе ви ја даде вистинската дијагноза. Експертите веруваат дека постојаниот замор може да биде знак за леукемија или лимфом.