Кога влегувате во ладна, климатизирана просторија, носот почнува да ви тече исто како што тоа се случува во зима кога од топлиот дом ќе излезете на ладно, објаснува доктор Џон Оман, шеф на Одделението за алергија на Тафтс медицинскиот центар во Бостон.
„Ладниот воздух е прекинувач за рефлекси на нервниот систем во носот, заради што жлездите во назалните мембрани почнуваат да произведуваат секрет. Тој проблем е уште поизразен кај оние кои патат од алергии. Но промените на температурата и влажноста на воздухот би требало да предизвикаат само краткотрајно течење на носот“, истакнува тој.
Алергологот доктор Марија Гарсија – Љорет објаснува дека оние кои патат од алергија се чувствителни на клима уредите заради тоа што ситните честички на полен, мувла, прашина и други алергени можат да бидат „заробени“ во уредот, а кои потоа се ослободуваат во воздухот кога уредот ќе се исклучи.
„Овие полутанти сами по себе не би предизвикале алергиска реакција, но можат да го иритираат носот. Изложеноста на честичките на мувла може да предизвика алергиска реакција која трае нешто подолго“, додава таа.
Заради сето ова докторот Ричар Лебовиц нагласува дека е исклучително важно редовно да се чисти клима уредот и да се менуваат филтрите.
„Ако не ги чистите и не ги менувате филтрите, сиот воздух кој го вдишувате поминува низ филтер прекриен со прашина која доспева и во воздухот, а тоа баш и не е препорачливо“, вели доктор Лебовиц.
Лебовиц уште нагласува дека клима уредите со чисти филтри всушност можат да ги намалат проблемите со синусите така што алергените нема да доспеат во воздухот, но додава и дека нема начин да се спречи моментално да почне да ви тече носот како резултат на промена на температурата и влажноста на воздухот.
