Половина од населението во земјава има проблем со инфекција со хеликобактер пилори. Станува збор за бактерија која живее во површинскиот слој на желудочната лигавица кај човекот. Се смета дека хеликобактер пилори инфекцијата е најчеста инфекција меѓу луѓето со застапеност од 50 % од светската популација
Инфекцијата обично се стекнува во детството. Со текот на годините застапеноста на станува се почеста. Според лекарите, станува збор за заразна инфекција со пренос на бактеријата уста на уста, лоша лична хигиена, пренаселеност и загадена вода. Бактеријата е изолирана од измет, плунка и вилицата на човекот. Единствен познат носител на хеликобактер меѓу животните е мачката.
Хеликобактерот кога ќе се појави може да предизвика неколку заболувања. Тоа се: воспаление и чир на желудникот (гастритис), чир и воспаление на дванаестопалечното црево, карцином на желудникот и малигно заболување на крвотокот.
Постојат повеќе начини за дијагностицирање на инфекцијата, меѓу кои спаѓаат неинвазивни тестови, серолошко тестирање (антитела во крв), антиген во измет, како и дишни тестови со радиоактивен јаглерод. Дијагноза на инфекцијата може да се постави и преку биопсија на желудочната лигавица. Она што е особено важно е дека сите тестови иако имаат висока точност, ниту еден од нив не е апсолутно сигурен. Пред тестирањето потребно е да се прекине третманот со лекови за желудникот и антибиотици во времетраење од две до четири недели.
Особено е важно дека еднаш лекуван пациент со хеликобактер треба постојано да се следи и повремено, на одреден интервал да се повторат тестирањата.
Сите позитивни пациенти на хеликобактер пилори инфекцијата немаат апсолутна индикација за лекување. Лекување треба да спроведат пациенти кои имаат:
- анемија (поради недостиг на железо);
- идиопатска тромбоцитопенична пурпура;
- симптоми на воспаление на желудникот и дванаестпалечно црево;
- чир на желудник и дванаестпалечно црево;
- оперирација на карцином на желудник;
- атрофичен гастрит.
Третманот на хеликобактер пилори инфекцијата се состои од едно до двонеделен третман со стандардна, тројна терапија – два антибиотика плус препарат кој го намалува создавањето на киселина во желудникот. Постојат повеќе облици и комбинации на овој третман, во зависност дали пациентот е алергичен на некој лек, дали е прв, втор или евентуално трет обид за третман. Успехот на најефикасните протоколи за терапија е повеќе од 95 % успех во лекувањето.
