Бронхијалната астма е хронично воспаление на дишните патишта кое доведува до нивно стеснување и тегоби во вид на свирење во градите, отежнато дишење, кашлица, недостаток на воздух и искашлување. За астмата не постои лек, но постојат начини да се држи под контрола, што на пациентите кои патат од оваа болест им остава можност да го прават она во што уживаат. Овие терапии вклучуваат лекови, имунотерапија и одбегнување тешки физички работи.
Во повеќето случаи станува збор за наследен фактор или е последица на вирусна инфекција. Затоа треба да се трудиме да живееме здраво, да не престојуваме во простории во кои доминира чадот од цигари или какви било други респираторни иританси. Доколку личноста која пати од астма е пушач, најдобар лек за неа ќе биде да престане да пуши. Редовната физичка активност и пливањето се, исто така, одличен пат до намалување на тегобите.
Основни симптоми на астмата се:
- Свирење во градите;
- Недостаток на воздух;
- Кашлица;
- Чукање на срцето;
- Отежнато дишење;
- Непријатност во градите;
- Слабост;
- Несвестица.
