Чајот од цвет од хибискус најчесто се користи како основа за разни овошни чаеви и чајни мешавини, но и самиот по себе поседува многу поволни здравствени својства, особено кога станува збор за кардиоваскуларното здравје.
Имено, повеќе студии укажуваат дека чајот од хибискус може да помогне кај покачен крвен притисок и да го намали систолниот, т.е. горниот притисок (за во просек 7.58 mmHg) и дијастолниот т.е. долниот притисок (за 3.53 mmHg), па на тој начин го намалува ризикот од кардиоваскуларни заболувања.
Покрај хипертензијата и зголемените липиди претставуваат фактор на ризик за појава на кардиоваскуларни болести, а чајот од хибискус може да помогне и кај овој здравствен проблем. Во едно истражување во кое учествувале пациенти со дијабетес, се покажало дека чајот од хибискус го зголемува нивото на ХДЛ холестерол, а ги намалува нивоата на ЛДЛ холестерол и триглицериди. Во едно друго истражување, пациентите со метаболен синдром земале 100 мг екстракт од хибискус дневно, што како резултат имало намалување на нивоата на вкупен холестерол и зголемување на нивоата на ХДЛ холестерол во крвта.
