Благодарение на активните состојки како што се пиперинот, лимоненот и др., биберот го поттикнува лачењето на желудочната киселина и на тој начин го подобрува процесот на варење и го подобрува апетитот.
Биберот делува и карминативно, што значи дека ја намалува надуеноста во стомакот и ги олеснува тегобите предизвикани од насобирањето на гасови во цревата. Се покажало дека овој зачин поседува и силни антибактериски и антиинфламаторни дејства, па на тој начин придонесува за здравјето на системот за варење.
Биберот го поттикнува слабеењето, но како?
Иако истражувањата покажале дека биберот всушност го поттикнува апетитот на тој начин што го стимулира сетилото за мирис, овој зачин, исто така, може да помогне и во процесот на слабеење. Имено, надворешната обвивка на зрно бибер содржи фитонутритиенти кои го поттикнуваат согорувањето на масните наслаги.
Во истражување од 2010 година кое е спроведено на глувци, исто така, е потврдено дека пиперинот од биберот го спречува таложењето на мастите во телото.
Биберот, исто така, делува како диуретик (го поттикнува излачувањето на мокрача) и дијафоретик (го поттикнува потењето), па така на овој начин го поттикнува исфрлањето на токсините и вишокот течности од организмот.
