Депресијата е заразна болест

Истражувањето покажало дека депресивниот начин на размислување и гледање на случувањата на луѓето со кои го поминуваме најголемиот дел од времето, може истото да го предизвика и кај нас.

Неодамнешно истражување на Универзитетет во Индијана ја потврдува онаа познатата  – ’со кој, таков си’, бидејќи покажува дека депресивниот начин на размислување и гледање на случувањата на луѓето со кои го поминуваме најголемиот дел од времето, може истото да го предизвика и кај нас.

Ова многу интересно истражување, објавено во списанието Clinical Psychological Science, направено е на студенти.

Истражувачите, пред се, разликуваат два вида на депресивен пристап на животот. Еден би можел да се нарече „безнадежност“. На пример, лице кое ја изгубило работата смета дека е негова лична грешка и тоа е знак дека повеќе нема да може да најде работа. Лицето кое има повеќе самодоверба, веројатно, како причина за губење на работата ќе ја обвини економската ситуација или таа ситуација ќе ја согледа како прилика да добие некоја подобра работа.

Другиот вид на депресивен пристап кон животот поврзан со развој на депресија, истражувачите ја нарекле „мозгање“. Овие лица постојано се фокусираат на сопственото негативно расположение. Тие размислуваат за тоа колку тажно се чувствуваат, се обидуваат да сфатат зошто се чувствуваат депресивно и се грижат што ќе им се случи ако се депресивни. За разлика од ова, лицата кои не се склони на депресија, ќе настојуваат да се одвратат себеси од депресивните мисли, на пример, така што ќе излезат во прошетка во природа или ќе одат на џогинг.

Истражувачите утврдиле дека „безнадежноста“ не е заразна, но „мозгањето“ е заразно. Истражувањето покажало дека студентите чии цимери биле склони на овој вид на депресивен пристап и сами се заразиле со тоа, како да станува збор за вирус. Притоа, е важно да се сфати дека не се „заразни“ самите симптоми на депресија, туку процесот на мислење што доведува до нив. И, секако, не станува збор за „зараза“, туку за човечка склоност свесно или несвесно да ги копираме другите луѓе.