Маслата од лаванда и чајно дрво може да предизвикаат абнормален раст на градите кај момчињата, познат како гинекомастија, покажала новата студија. Иако најчесто се сметаат за корисни и безопасни, постојат се повеќе докази дека некои етерични масла може да имаат негативни ефекти врз здравјето на луѓето.
Етеричните масла содржат бројни хемиски соединенија и треба да се употребуваат со доза на претпазливост, бидејќи некои од овие хемикалии може да предизвикаат ендокрини пореметувања. Имено, може да влијаат на човековите хормони и нивното дејство.
Инаку, абнормалното зголемување на градите кај лица од машки пол, познато како гинекомастија, главно се припишува на хормоналното пореметување.
Претходните истражувања покажале дека маслото од лаванда и чајно дрво може да го ограничат дејството на хормоните кои се од суштинско значење за формирање на машките полови карактеристики.
Резултатите од ова истражување покажале дека четири хемиски соединенија заеднички и за лавандата и за чајното дрво (еукалиптол, 4-терпинеол, дипентен/лимонен и алфа-терпинеол) и четири хемиски соединенија кои може да се најдат или во едното или во другото масло (линалил ацетат, линалол, алфа-терпинен и гама-терпинен), имаат различен степен на естрогени и/или антиандрогени својства.
Треба да се напомене дека горенаведените хемиски соединенија може да се најдат и во други 65 етерични масла, а нивната продажба не е законски регулирана, било истакнато на неодамнешниот светски настан за презентирање на најновите случувања во ендокринологијата што се одржа од 17-20 март во Чикаго, Илиноис (ENDO 2018).
