Кога ве мачат стомачни тегоби како што се дијареја, надуеност или воопшто лошо варење во тие денови најдобро е да консумирате намирници кои се лесно сварливи.
Најпрво, тоа е двопек кој помага при мачнини и ја ублажува жиговината. Најдобро би било да е двопек од бело брашно (се разбира, доколку немате интолеранција на глутен), бидејќи интегралниот двопек содржи влакна кои можат да бидат проблематични за варење.
Солените крекери, исто така, често се препорачуваат кај мачнини, особено во бременост при утрински мачнини. Белиот ориз претставува добар извор на енергија, додека истовремено не го оптоварува дигестивниот тракт.
Потоа се препорачуваат компир, батат и зрели банани, кои содржат лесно сварливи јаглехидрати, како и минерали кои во голема мера се губат доколку ве мачи дијареја.
Кога станува збор за намирниците од животинско потекло, пилешкото претставува одличен извор на протеини и генерално лесно се вари така што станува збор за добар избор доколку имате пречки со дигестијата. Најдобро е да се јаде печено, варено или пилешко на скара, а одбегнувајте пржена варијанта зашто маслото може дополнително да ги влоши симптомите. Одличен избор е и лососот кој содржи големо количество омега-3 масни киселини, додека истовремено не го оптоварува дигестивниот тракт.
Од друга страна, би требало да се одбегнува храна богата со масти, влакна, потоа пржена, лута и кисела храна, како и некои намирници кои обилуваат со протеини од животинско потекло (говедско, свинско, јагнешко) со оглед на тоа дека на телото му е потребно повеќе енергија и време да ја свари оваа храна.
