Најновите податоци од САД покажуваат дека ракот на белите дробови многу почесто се дијагностицира кај млади жени отколку кај млади мажи. Инаку, порано беше познато дека ракот на белите дробови се јавува во поголем број на случаи кај мажите. Исто така, забележано е дека аденокарциномот на белите дробови е почест кај жените отколку кај мажите.
Пораката до пушачите е јасна: што побрзо да престанат со пушењето
Треба да се спомене дека околу 85 проценти од случаите на рак на белите дробови во САД се поврзани со пушењето. Порано, љубителите на цигари беа претежно мажи, но сега односот помеѓу мажите и жените е речиси изедначен.
Некои претходни истражувања сугерираат дека жените би можеле да бидат биолошки почувствителни од штетните ефекти од чадот на цигарите.
Според мислењето на докторите, пораката до пушачите е јасна: што побрзо да престанат со пушењето. Исто така, пушачите треба да имаат на ум дека луѓето кои ќе престанат да пушат до 40-годишна возраст имаат поголема шанса да го избегнат ракот на белите дробови, пишува „New England Journal of Medicine“.
