Луѓето кои се изложени на загаден воздух се соочуваат со 40 % поголем ризик од појава на деменција, покажало најновото истражување спроведено на Универзитетот во Лондон.
Како што пишува „British Medical Journal“, најголемото зголемување на ризикот за деменција е забележано кај луѓе кои дишат најзагаден воздух. Кај лицата кои живеат во области со највисоки концентрации на азот оксид во воздухот, бил утврден до 50 % повисок ризик од деменција. Во студијата биле користени податоци собрани од 131 000 жители на Лондон.
Учесниците во истражувањето на почетокот на седумгодишниот период на набљудување биле на на возраст од 50 до 79 години. Воочената врска помеѓу загадувањето и деменцијата не зависела од евентуалното присуство на други фактори на ризик, како што се, на пример, пушењето или дијабетесот
Деменција претставува губење на менталните способности на претходно здрава личност, нешто што е сосема поинакво од нормалното стареење. Може да биде статична, да се појави како резултат на несекојдневна, целосна повреда на мозокот или прогресивна, која резултира од долготрајно влошување на здравствената состојба предизвикана од болест или повреда на телото. Иако деменцијата е најзастапена помеѓу личностите во длабока старост, може да се појави и пред 65-тата година од животот. Деменцијата е збир на знаци и симптоми, при што се засегнати меморијата, вниманието, јазикот и решавањето на проблеми.
Во најчестите видови на деменција спаѓа Алцхајмерова болест, деменција на предниот дел од слепоочницата, семантичка деменција, васкуларна деменција и деменција со Луи тела.
