Цитрусното овошје – портокалите, мандарините, лимоните, лиметата, грејпфрутот; изобилува со нутритиенти кои го зајакнуваат имунитетот, поволно делуваат на кардиоваскуларното здравје, помагаат во превенција од различни болести и ја прават кожата поубава.
Ова овошје изобилува со витамин Ц, кој, иако не може да нè заштити од настинка, може да го скрати траењето и да ги ублажи симптомите. Витаминот Ц игра важна улога и во процесот на создавање колаген (па на тој начин придонесува за поубав изглед на кожата), а ја поттикнува и апсорпцијата на железото од храната, како и катехинот – антиоксидант од зелениот чај.
Цитрусното овошје содржи и флавоноиди, антиоксиданти кои имаат кардиопротективно дејство, како и растворливи влакна кои помагаат во регулацијата на нивото на холестерол и глукоза во крвта. Уште една важна состојка која ја содржи ова овошје е и калиумот – овој минерал е од клучно значење за регулирање на течностите и рамнотежата на минералите во организмот, како и за мускулната контракција. Адекватниот внес на калиум, исто така, го намалува ризикот од срцеви болести.
Одредени студии укажале и на улогата на оваа група овошје во превенцијата од карцином. Поголемиот внес на цитруси може да се поврзе со намалување на ризикот од рак на панкреасот, додека една друга студија укажала дека личностите кои јадат барем три порции цитруси неделно имаат за 28 отсто помали шанси за да заболат од рак на желудникот.
