Јадете како Викинг и намалете го ризикот од деменција

Морските плодови, житарки со цели зрна и јаткасти плодови во голема мера се заслужни за превенција на когнитивно пропаѓање и појава на болести од кои многумина стравуваат

Да се јаде како Викинг за многумина можеби изгледа непривлечно, но станува збор за исхрана која е многу слична на медитеранската, а додаток плус е канола маслото. Истражувањата спроведени во последните години покажале дека исхраната што ја практикува населението во нордиските земји (Данска, Шведска, Норвешка и Финска) е значително поздрава од медитеранската.

Богата со протеини, омега-3 масни киселини и антиоксиданти, скандинавската исхрана се базира на риба, немасно црвено месо, коренест зеленчук, зрнесто овошје и ржан леб.

Шестгодишното кинеско истражување завршило со заклучок дека овој начин на исхрана може да го намали ризикот од деменција и до 30 проценти

Морските плодови, житарки со цели зрна и јаткасти плодови во голема мера се заслужни за превенција на когнитивно пропаѓање и појава на болести од кои многумина стравуваат.

Кинеското истражување покажало дека за зачувување на здравјето е најдобро да се консумираат сезонски намирници, кои е најдобро да се зачинат со канола масло, кое се поврзува со производството на „добрите“, кафеави маснотии, кои учествуваат во стабилизација на нивото на шеќерот во крвта. И не треба да се заборави на физичката активност.

Научниците од Медицинскиот универзитет во Тијанџин шест години ја следеле здравствената состојба на 2 223 лица постари од 65 години, на кои не им била дијагностицирана деменција, а преку прашалник давале одговори за нивната исхрана.

Откритието било претставено на неодамнешната Меѓународна конференција на Здруженијата за Алцхајмерова болест што се одржала во Чикаго.