Досегашните податоци укажуваат на тоа дека омикрон предизвикува поблага клиничка слика на КОВИД-19 кај заболените, но се шири побрзо од претходните варијанти. Лекарите предупредуваат да обрнете внимание на два симптома кои може да укажуваат дека сте заразени со омикрон.
Мачнина и повраќање
Уште од почетокот на пандемијата, Центарот за контрола и превенција на болести (ЦДЦ) ги вброи мачнината и повраќањето на листата на можни симптоми за КОВИД-19. Но, лекарите сега предупредуваат дека токму овие два симптома може најрано да се појават кај пациентите кои се заразени со омикрон варијантата.
“Кај делта, симптомите на горните дишни патишта беа многу сериозни и се јавуваа во белите дробови. Пациентите би имале воспаление на белите дробови, потешкотии со дишењето и би завршувале на респиратор“, вели Бил Адмир, главен медицински службеник во болница во Алабама.
“Но, кај омикрон, пациентите во поголем процент имаат гастроинтестинални проблеми и имаат повеќе симптоми“, додава лекарот.
Истражување објавено во списанието Journal of Microbiology, Immunology, and Infection покажало дека желудочните проблеми се релативно чест, ран симптом на вирусот.
Во истражувањето се наведува дека мачнината и повраќањето се јавуваат и кај возрасните и кај децата и може да бидат почетни симптоми на инфекција.
Понатаму, гастроинтестиналните симптоми исто така може да бидат знак дека лицето е заразено со омикрон, и дека не се работи за обична настинка.
Тим Спектор, професор по генетска епидемиологија на Кралскиот колеџ во Лондон, истакнува дека овие два гастроинтестинални симптома почесто се појавуваат кај лица кои се ревакцинирани или кои примиле бустер доза.
