Како црвената зелка помага кај кардиоваскуларни и дигестивни тегоби

Претставува одличен извор на антиоксиданти (каротеноиди и флавоноиди) благодарение на кои помага во борбата против воспаленија кои често водат кон хронични болести.

Црвената зелка е со сличен вкус како и зелената, а притоа обилува со дополнителни фитонутритиенти кои придонесуваат за подобро кардиоваскуларно и дигестивно здравје. Кога се витамините и минералите во прашање, црвената зелка содржи витамини А, Б6, Ц и витамин К, како и калиум. Претставува одличен извор на антиоксиданти (каротеноиди и флавоноиди) благодарение на кои помага во борбата против воспаленија кои често водат кон хронични болести.

Антоцијанинините, флавоноиди заслужни за виолетовата боја на овој тип зелка, помагаат во регулирањето на зголемениот крвен притисок и превенцијата од кардиоваскуларни заболувања. Овие антиоксиданти заедно со сулфорафанот, кој, исто така, се наоѓа во црвената зелка помагаат во превенцијата од рак на дебелото црево. Истражувања покажале и дека исхраната богата со зеленчук од оваа фамилија може да се поврзе со понизок ризик од рак на дојка.

И конечно, благодарение на високата содржина на растворливи влакна, црвената зелка поволно делува и на пробиотските бактерии во цревата. А ги ублажува и гастроинтестиналните пореметувања како што се синдромот на иритабилен колон и улцеративен колитис.