Калиумот го намалува ризикот од мозочен удар за над 20 отсто

Во повеќето прегледани студии истражувачите ги земале предвид и другите ризик фактори за болести на срцето и мозочен удар, меѓутоа лицата кои консумирале повеќе калиум можеле да донесат попаметни одлуки за здравјето и да имаат здрави навики со што би можел да се објасни процентот на намалениот ризик

Италијански стручњаци анализирале податоци од 11 студии во кои биле вклучени 250 илјади лица во период од 19 години за да можат да забележат кој од испитаниците доживеал мозочен удар или боледувал од срцева болест, а им било мерено нивото на калиум во урината. Истражувачите од Медицинскиот факултет во Наполи утврдиле дека со дневно зголемиот внес на калиум од 1 630 милиграми се намалил ризикот од мозочен удар за 21 процент.

Во повеќето прегледани студии истражувачите ги земале предвид и другите ризик фактори за болести на срцето и мозочен удар, меѓутоа лицата кои консумирале повеќе калиум можеле да донесат попаметни одлуки за здравјето и да имаат здрави навики со што би можел да се објасни процентот на намалениот ризик, истакнуваат италијанските стручњаци. Нивното истражување е објавено во списанието Journal of the American College of Cardiology.

Богат избор на минералот калиум се овошјето и зеленчукот, а калиумот ги неутрализира и киселините. Истражувањата покажале дека лицата кои јадат храна богата со калиум имаат силен скелет.

Потребната дневна доза е 4 700 мг од храна, а сите додатоци на калиум може да бидат опасни за срцето. Намирници богати со калиум се бананата, портокалот, печениот компир, сливите, грозјето и доматот.