Киселата зелка и кефирот-моќни пробиотици

Киселата зелка содржи соеви на корисни бактерии, Lactobacillus plantarum, кои се одлични за варењето и за поддршка на имунолошкиот систем

Киселата зелка е традиционално зимско јадење, кое се подготвува речиси во секој дом. Иако сезоната е на заминување, сепак добро е да се знаат позитивните ефекти кои консумацијата на оваа храна ги има за здравјето на луѓето.

Киселата зелка содржи соеви на корисни бактерии, Lactobacillus plantarum, кои се одлични за варењето и за поддршка на имунолошкиот систем. Богата и со витамин Ц и помага против грип, а во цревата помага на да се формираат антитела кои се борат со  салмонелата и ешерихија коли.

И киселите краставички имаат сличен ефект како и зелката. Содржат витамини Ц, А и витамини од групата Б. Тие се силен антиоксиданс и пробиотик, го балансираат варењето и го забрзуваат создавањето на добрите бактерии.

За одржувањето на добрата кондиција на дигестивниот тракт, луѓето најчесто им веруваат на ферментираните млечни производи. Тие природно содржат живи бактерии, а често и додатно се збогатуваат. Најчесто користените пробиотици се соевите Lactobacillus и Bifidobacterium.

Освен јогуртот, кефирот е еден ферментиран млечен производ кој е меѓу најбогатите со добри бактерии. Се произведува со додавање на зрна кефир во млекото, кое ја поттикнува ферментацијата. Тоа предизвикува појава на широк спектар на пробиотички бактерии кои ги содржи кефирот и кои се од големо значење за цревната флора. Се препорачува за габичните заболувања и за зајакнување на имунолошкиот систем.

Пробиотиците играат една од клучните улоги во ​​зајакнување на  имунолошкиот систем, со оглед на тоа дека повеќето клетки на имунолошкиот систем се наоѓаат во цревата. Телото е домаќин на милијарди бактерии, од кои повеќето се “добри”, корисни бактерии, некои можат да бидат и штетни, а микрофлората е најгусто населена во цревата. Пробиотиците се всушност соеви на бактерии кои имаат позитивни ефекти врз здравјето и имунитетот. Овие бактерии природно се наоѓаат во храната или, пак, таа е збогатена со нив.