Одредни масла освен во исхраната може да се користат и во козметиката како производ што се грижи за здравјето на телото однадвор. Истовремено може да се употребуваат и како домашни лекови и кај децата и кај возрасните бидејќи немаат никаков несакан ефект. Она на што особено треба да се внимава со маслата е како се чуваат и да се внимава на нивниот рок на траење.
Пченкарно масло
Се користи и за варење и за салати. Свежото масло е со темножолта боја, непријатен мирис и вкус и лесно се вари, а со рафинирање добива светложолта боја, пријатен мирис и вкус. Богато е со витамин Е и со незаситени масни киселини кои го чуваат нашиот организам од стареење. Поради високо вредни нутритивни состојки, највеќе се користи за диети. Рокот на траење на ова масло е 12 месеци.
Кокосово масло
Наједноставно кажано, кокосовото масло е едно од најздравите масла кое може да се употребува во исхраната, најбезбедниот козметички производ на пазарот и задолжителен дел од сечие шкафче со лекови.
Составено е од околу 50 % лауринска киселина, а истата таа киселина се наоѓа и во мајчиното млеко, кое всушност претставува единствен друг познат добар извор на лауринска киселина. Ова е состојката којашто му дава на кокосовото масло неверојатни антивирусни, антигабични и антибактериски својства, и е корисна како за внатрешна, така и за надворешна употреба. Многу истражувања покажале дека консумирањето кокосово масло може да му помогне на нашето тело да изгради отпорност кон вируси (кои предизвикуваат грип, сипаници, хепатит, херпес) и бактерии (одговорни за чирови, инфекции во грлото, инфекции на уринарниот тракт, пневмонија и гонореја), како и габични инфекции и кандида. Тоа, исто така, позитивно влијае врз контролирањето на тироидната жлезда и шеќерот во крвта. Кокосовото масло содржи здрава форма на заситени масти, што значи неговото консумирање помага во забрзување на метаболизмот. И не само што не се претвора во масти, туку со покренување на метаболизмот му овозможува на телото да согорува повеќе масти, истовремено давајќи му повеќе енергија (гориво и за мозокот и за мускулите) и поголема издржливост. Сето ова резултира и со губење на вишокот килограми и одржување на здрава и избалансирана тежина.
Масло од репка
Нема специфичен вкус, така што не е убаво за салати и сосови, но затоа е идеано за варење, печење, пржење. Благодарение на своите особини, се користи како основа за други, специјални врсти на масла. Ги намалува маснотиите во организмот, бидејќи има десет пати повеќе омега-3 масни киселини од маслиновото масло. Сепак, ова масло содржи и еручна киселина која делува лошо на организмот. Кога го купувате ова масло, прочитајте на декларацијата дали производителот ја исфрлил оваа киселина.
Масло од тиква
Постепено воведувајте го во исхраната, бидејќи има многу специфичен вкус. Ова масло е идеално како прелив за салати, а може да се користи и за пржење на зеленчук. Богато е со витамини А, Д и Е, па поради тоа го зајакнува имунитетот, го зголемува бројот и квалитетот на сперматозоиди, но и ги ублажува тегобите при воспаление на простатата.
